Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 169 Hüküm no: 86 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nalıncızade Attar Mustafa’nın çocuklarının vasisi İbrahim Çelebi, İsak Yahudi’de Mustafa’nın alacağı olduğu iddiasıyla açtığı davada haksız bulunduğu Kezâlik akd-i meclis-i şer‘-i şerîf ettikde müteveffâ-yı mezbûrun sulbiye sagīre kızları Hadîce ve Emine ve Safiye’nin tesviye-i emrlerine min-kıbeli’ş-şer‘ vasiyy-i mansûbları mezbûr İbrahim Çelebi meclis-i ma‘kūd-ı mezbûrda işbu bâ‘isü’s-sifr Katalan cemâ‘atinden olup mahrûse-i Galata müzâfâtından Kuruçeşme’de sâkin İsak v. Yako nâm Yahûdi mahzarında bi’l-vesâye üzerine da‘vâ ve takrîr-i kelâm edip müteveffâ-yı mezbûr el-Hâc Mustafa b. Mahmud’un işbu yedimde olan deyn temessüğü mûcebince mesfûr İsak zimmetinde cihet-i deyn-i şer‘îden dört yüz guruş hakkı olup meblağ-ı mezbûru kable’l-ahz ve’l-istîfâ fevt olmağla meblağ-ı mezbûr dört yüz guruşu vesâyetim hasebiyle mesfûr İsak’dan taleb ederim suâl olunsun dedikde gıbbe’s-suâl mesfûr İsak cevâbında deyn-i mezkûru ikrâr lâkin <> meblağ-ı mezbûr dört yüz guruş mukābelesinde müteveffâ-yı mezbûr el-Hâc Mustafa b. Mahmud b. Hasan işbu meclisde hâzır olup mu‘âyene olunan yüz sekiz miskāl hâlisü’l-ayâr bütün altın kuşak ile yüz on iki miskāl altın bileziğini rehin olmak üzere huzûr-ı Müslimînde <> def‘ u teslîm edip ol dahi ber-vech-i muharrer kabz ve tesellüm ettikden sonra meblağ-ı mezbûrun iki yüz guruşunu dahi müteveffâ-yı mezbûr el-Hâc Mustafa’ya hayâtında fevtinden üç ay mukaddem iki yüz guruş olmak üzere seksen aded cedîd tuğrâlı altını yine huzûr-ı Müslimînde def‘ u teslîm edip ol dahi kabz etmekle müteveffâ-yı mezbûra cihet-i mezbûreden zimmetimde ancak iki yüz guruş deynim vardır deyü def‘le mukābele edip istintâk olunsun dedikde gıbbe’l-istintâk ve’l-inkâr müdde‘î-i mesfûr İsak’dan def‘-i meşrûhuna beyyine taleb olundukda udûl-ı Müslimînden olup zikr olunan el-Hâc Hasan mahallesinde sâkin Süleyman Çelebi b. Abdullah ve Karanlıkmescid mahallesinde sâkin es-Seyyid Mustafa Çelebi b. es-Seyyid el-Hâc Mehmed li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müdde‘î-i mesfûr İsak v. Yako meblağ-ı mezbûr dört yüz guruş deyni mukābelesinde müteveffâ-yı mezbûra hayâtında işbu meclise hâzır olup mu‘âyene olunan yüz sekiz miskāl hâlisü’l-ayâr bütün altın kuşak ile yüz on iki miskāl altın bileziğini rehin olmak üzere huzûrumuzda def‘ u teslîm edip ol dahi ber-vech-i muharrer kabz ve tesellüm ettikden sonra meblağ-ı mezbûrun iki yüz guruşunu dahi müteveffâ-yı mezbûra hayâtında fevinden üç ay mukaddem iki yüz guruş olmak üzere seksen aded cedîd tuğrâlı altını yine huzûrumuzda def‘ u teslîm edip ol dahi ber-vech-i muharrer yedinden ahz u kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a [vâki‘ hâli] mevlânâ-yı mezbûr kezâlik inhâ etmeğin mâ-vaka‘a kayd-şüd. Fî 23 min-Muharrem sene 1110 Şuhûdü’l-hâl: Es-sâbikūn es-sâbikūn es-sâbikūn.