Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 614 Hüküm no: 760 Orijinal metin no: [135a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi b. Ahmed’in Hacı Süleyman b. Ahmed’de kefaleti sebebiyle alacağı olduğu Mahmiye-i İstanbul’da Muhsine Hâtun mahallesinde sâkin işbu râfi‘ü’l-kitâb Şâmî Mehmed Efendi b. Ahmed meclis-i şer‘-i şerîf-i enverde el-Hâc Süleyman b. el-Hâc Ahmed mahzarında üzerine da‘vâ ve takrîr-i kelâm edip zimmetinde yedimde olan hüccet-i şer‘iyye nâtıka olduğu üzre yedimden müşterâ ve makbûz beynimizde ilm-i şer‘î ile ma‘lûm emti‘a-i mütenevvi‘a bahâlarından iki yüz doksan altı buçuk guruş ve gāib ani’l-meclis Mesrob nâm Ermeni zimmetinde cihet-i mezkûreden dört yüz dört esedî hakkıma emr ve kabûlü hâviye kefâlet-i sahîha-i şer‘iyye kefîl olup zimmetine cihet-i deyn-i şer‘îden dahi iki yüz esedî guruş ki min haysi’l-mecmû‘ beş yüz otuz dört buçuk esedî guruş hakkım olup meblağ-ı mezbûrdan altmış esedî guruşunu bana edâ ve teslîm ben dahi ahz u kabz edip dört yüz yetmiş dört buçuk esedî guruş hakkım bâkī kalmağın hâlâ suâl olunup meblağ-ı mezbûrun alıverilmesi matlûbumdur dedikde gıbbe’s-suâl mezbûr el-Hâc Süleyman cevâbında fi’l-hakīka müdde‘î-i mezbûra cihât-ı mezkûreden kabzını mu‘terif olduğu altmış guruşdan mâ‘adâ dört yüz yetmiş dört buçuk esedî guruş zimmetinde lâzımü’l-edâ deyni olduğunu ikrâr ve i‘tirâf etmeğin alâ mûcebi i‘tirâfihî meblağ-ı mezbûru müdde‘î-i mezkûra edâ ve teslîme mezbûr el-Hâc Süleyman’a tenbîh olunup mâ vaka‘a bi’t-taleb ketb olundu. Fi’l-yevmi’s-sâlis aşer min Şevvâli’l-mükerrem li sene seb‘a ve tis‘în ve elf. Şuhûdü’l-hâl: Mustafa Çelebi b. Ahmed, Ebûbekir b. Ahmed, Mustafa b. Hüseyin, Halil Beşe tâbi‘-i Efendi hazretleri.