Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 170 Hüküm no: 87 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Receb’in varisleri murislerinin vefat eden Serkâtib Ahmed Ağa’da alacağı olduğunu ispat ettikleri Mahmiye-i İstanbul’da Mahmudpaşa mahallesinde sâkin iken bundan akdem vefât eden el-Hâc Receb b. Mustafa’nın verâseti zevce-i metrûkesi Hadîce Hatun bt. Abdullah ile sulbî kebîr oğlu Süleyman Çelebi’ye münhasıra oldukdan sonra mezbûr Süleyman Çelebi asâleten ve mezbûre Hadîce Hatun’un vekîl-i müsecceli ve hâlen zevci Mustafa Efendi b. Hüseyin vekâleten meclis-i şer‘-i şerîfde Dergâh-ı âlî kapıcıbaşılarından olup medyûnen vefât eden Ser-kâtib Ahmed Ağa b. Mustafa Efendi’nin terekesini kabz ve düyûn-ı müsbetesini edâya ve hüccet-i şer‘iyye ile vasî ve kayyım nasb olunmağla terekesine vaz‘-ı yed eden İsmail Ağa b. Hüseyin mahzarında üzerine her biri da‘vâ ve takrîr-i kelâm edip mûrisimiz merkūm el-Hâc Receb’in müteveffâ-yı merkūm Ser-kâtib Ahmed Ağa b. Mustafa Efendi zimmetinde beynlerinde ma‘lûm eşyâ bahâsından temessüğü mûcebince yüz yirmi altı guruş hakkı olmağla hayâtında meblağ-ı mezbûrun elli beş guruşunu merkūm Ahmed Ağa’dan ahz u kabz edip bâkī yetmiş bir guruşunu kable’l-ahz mezbûr el-Hâc Receb vefât etmeğin bundan akdem meblağ-ı bâkī-i mezbûr yetmiş bir guruşu hayâtında mezbûr Ahmed Ağa’dan taleb eylediğimizde şuhûd mahzarında ikrâr ve işhâd ettiğinden sonra kable’l-edâ vefât etmeğin hâlâ terekesinden taleb ederiz suâl olunsun dediklerinde gıbbe’s-suâl ve’l-inkâr müdde‘iyân-ı mezbûrândan sıdk-ı makāllerine beyyine taleb olundukda merhûm Vanî Efendi’nin medresesinde sâkin Hasan Efendi b. Ali ve mahalle-i mezbûrede sâkin Mustafa Çelebi b. İbrahim li-ecli’ş-şehâde meclis-i şer‘a hâzırân olup işhâd olunduklarında fi’l-vâki‘ müdde‘iyân-ı mezbûrân bundan akdem meblağ-ı bâkī-i mezbûru müteveffâ-yı merkūm Ser-kâtib Ahmed Ağa b. Mustafa Efendi’den taleb eylediklerinde merkūm Ahmed Ağa temessüğü mûcebince meblağ-ı bâkī-i mezbûr yetmiş bir guruş vârisân-ı merkūmâna vâcibü’l-edâ zimmetinde deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olup mezbûr Süleyman Çelebi tahlîf-i şer‘î ile ba‘de’t-tahlîf hissesinde mevkūfen alâ-yemînü’l-müvekkili’l-mezbûra mûcebince ba‘de’l-hükm mâ-va[ka‘a] kayd-şüd. Fi 4 Safer sene 1110 Şuhûdü’l-hâl: Abdi Ağa b. Haydar Paşa el-vekîl, Şatır İbrahim Bey b. İsmail, el-Hâc Abdullah Çukadâr, Hüseyin Çelebi b. Mehmed, Ahmed Çelebi b. Süleyman, Hacı Halil b. Abdi, Hüseyin Ağa b. İbrahim, Yahya Çelebi b. Hulvânî, Ömer Çavuş b. Abdi, el-Hâc Mustafa b. Hüseyin.