Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 171 Hüküm no: 88 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi’nin vefat eden Hamza Ağa’daki alacağının terekeden ödenmesi Husûs-ı âti’l-beyânın mahallinde istimâ‘ ve tahrîri içün cânib-i şer‘den matlûben irsâl olunan Mevlânâ es-Seyyid Abdülmuti Efendi mahmiye-i İstanbul’da Mollagürânî mahallesinde sâkin umdetü’l-eşbâh ve’l-a‘yân el-Hâc Mehmed Ağa b. Cafer Ağa’nın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde mûmâ-ileyh el-Hâc Mehmed Ağa’nın eniştesi olup bundan akdem vefât eden el-Hâc Hamza Ağa b. Mehmed b. Abdullah’ın sulbî kebîr oğlu Ahmed Çelebi meclis-i ma‘kūd-ı mezbûrda müteveffâ-yı mezbûrun evlâd-ı sıgārı Abdurrahman ve Rukiye’nin vasiyy-i mansûbları olmağla terekesine vâzı‘u’l-yed olan Ahmed Ağa b. Cafer Ağa mahzarında üzerine da‘vâ ve takrîr-i kelâm edip babam mezbûr el-Hâc Hamza Ağa b. Mehmed b. Abdullah hayâtında bin doksan dokuz senesi Şa‘bânı’nda vefât eden vâlidem Rahime Hatun bt. Cafer Ağa’nın terekesinden işbu defter-i kassâmda tahrîr olunan yirmi üç bin üç yüz otuz üç sağ akçe hisse-i irsiyesi ben sagīr iken velâyeten kabz ve kendi mesârifine sarfla istihlâk edip kable’d-damân vefât etmekle terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı Müslimînden mûmâ-ileyh el-Hâc Mehmed b. Cafer Ağa ve mahalle-i Kocamustafapaşa sükkânından el-Hâc Bektaş Ağa b. Abdurrahman li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Hamza Ağa b. Mehmed b. Abdullah hayâtında bin doksan dokuz senesi Şa‘bânı’nda vefât eden müdde‘î-i mezbûr Ahmed Çelebi’nin vâlidesi mezbûre Rahime Hatun bt. Cafer Ağa’nın terekesinden işbu defter-i kassâmda tahrîr olunan yirmi üç bin üç yüz otuz üç sağ akçeyi mezbûr Ahmed Çelebi’nin hisse-i irsiyesini mezbûr Ahmed Çelebi sagīr iken huzûrumuzda velâyeten kabz ve kendi mesârifine sarfla istihlâk eyleyip kable’d-damân vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î <> mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Hasan Çelebi b. Abdullah ile meclis-i şer‘a gelip alâ-vukū‘ihi inhâ etmeğin mâ-vaka‘a kayd-şüd. Fî 28 Muharrem sene 1110 Şuhûdü’l-hâl: Ömer Ağa b. el-merhûm Cafer Ağa, Halil Beşe b. İbrahim, el-Hâc Ahmed b. Osman, Müezzin Mehmed Çelebi b. Mahmud, Deli Bekir b. Hasan, Süleyman Beşe b. Selim, Hasan Çelebi b. Hasan, Hüseyin Çelebi b. Mehmed ve gayruhum.