Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 181 Hüküm no: 96 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Muharrem Bey’in yetimi Fatıma’nın ihtiyaçları için günlük iki para nafaka takdir edildiği Mahmiye-i İstanbul’da Bahçekapısı kurbünde Hocapaşa mahallesi ahâlîsi iken bundan akdem vefât eden Bostânî mütekā‘idlerinden Muharrem Bey b. Abdülmuttalib’in sulbiye sagīre kızı Fâtıma’nın tesviye-i umûruna kıbel-i şer‘den bir vasî nasb ü ta‘yîn olunmak lâzım ve mühim olmağın emânet ile ma‘rûf olup vesâyete her vechile kādir olduğu lede’ş-şer‘ zâhir olan müteveffâ-yı mezbûrun akrabâsından olup Çelebioğlu mahallesinde sâkin işbu hâfızü’l-kitâb Salih Ağa b. Mustafa’yı hâkim-i muvakkı‘-i sadr-ı kitâb tesviye-i umûr-ı sagīre-i mezbûreye vakt-i rüşd ü sedâdına varınca vasî nasb ü ta‘yîn buyurdukda ol dahi vesâyet-i mezbûru kabûl ve merâsimini edâya ta‘ahhüd ettikden sonra mezbûr Salih Ağa talebiyle sagīre-i mezbûrenin nafaka ve kisvesi’çün mal-ı müntakilinden târîh-i kitâbdan yevmî ikişer para hâkim-i müşârün-ileyh farz ve takdîr buyurup meblağ-ı mefrûz-ı mezkûru levâzım-ı sagīre-i mezbûreye harc ü sarfa ve inde’z-zarûre istidâneye ve lede’z-zafer malına rücû‘a vasiyy-i mezbûr Salih Ağa’ya izin birle mâ-vaka‘a kayd-şüd. Fî 25 Muharrem sene 1110 Şuhûdü’l-hâl: İbrahim Efendi b. Hüseyin, Mehmed Efendi b. Ali, Osman Bey b. Süleyman, Ali Bey b. Mahmud, Hüseyin Bey b. Mustafa, Mustafa Bey b. Murtaza, Mehmed b. Ahmed, Ahmed b. Ali.