Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 182 Hüküm no: 97 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Abdurrahman Bey’in yetimi Ayşe’nin vasisinin istifasıyla yerine amcası Mustafa Efendi’nin tayin edilip çocuğun ihtiyaçları için nafaka takdir edildiği Mahmiye-i İstanbul’da Nallımescid mahallesinde İmam Ali odaları denmekle ma‘rûf odaların birinde sâkin iken bundan akdem vefât eden Bostânî mütekā‘idlerinden Abdurrahman Bey b. Aydın’ın sulbiye sagīre kızı Âişe’nin tesviye-i umûruna vasiyesi ve vâlidesi Saliha Hatun bt. Abdullah mahfil-i kazâda bi’l-vesâye takrîr-i kelâm edip kızım sagīre-i mezbûrenin levâzımını edâya kudretim olmayıp vesâyet-i mezbûreden rızâm ile kasr-ı yed etmekle şer‘an vesâyetden azl ve yerine kıbel-i şer‘den bir vasî nasbı lâzım ve mühim olmağın emânet ve diyânet ile ma‘rûf olduğu zeyl-i kitâbda muharrerü’l-esâmî Müslimîn haberleriyle lede’ş-şer‘ zâhir olan sagīre-i mezbûrenin li-ebeveyn ammi olup Molla Şeref mahallesinde sâkin hâfızü’l-kitâb Halil b. el-mezbûr Aydın’ı hâkim-i muvakkı‘-ı sadr-ı kitâb efendi vasiye-i ma‘zûlenin yerine tesviye-i umûr-ı sagīre-i mezbûreye vakt-i rüşd ü sedâdına varınca vasî ve üzerine mezbûre Saliha bt. Abdullah ile Hadîka-i şehriyârîde müezzinbaşı olan Mustafa Halîfe b. Mehmed’i hasbî nâzır nasb ü ta‘yîn buyurduklarında onlardan her biri vesâyet ve nezâret-i mezbûreleri kabûl ve merâsimlerini edâya müte‘ahhid olduklarından sonra vasiyy-i mezbûr Halil talebiyle mal-ı müntakilinden târîh-i kitâbdan yevmî ikişer para sagīre-i mezbûre Âişe’ye hâkim-i müşârün-ileyh nafaka ve kisve-bahâ farz ve takdîr buyurup meblağ-ı mefrûz-ı mezkûru levâzım-ı sagīre-i mezbûreye harc ü sarfa ve inde’z-zarûre istidâneye ve lede’z-zafer sagīre-i mezbûrenin malına rücû‘a vasiyy-i mezbûra izin vermeğin mâ-vaka‘a kayd-şüd. Fî gurre-i Safer sene 1110 Şuhûdü’l-hâl: İbrahim Efendi b. Hüseyin, Şa‘bân Efendi b. Mustafa İmâm, Ali Efendi b. Mustafa, İbrahim Çelebi b. Şa‘bân, Mehmed Beşe b. Receb, Hasan Bey b. Ahmed, Mustafa Bey b. Hüseyin, Hasan Bey b. Hüseyin, Osman Bey b. Receb, Kara Mehmed b. Hüseyin.