Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 197 Hüküm no: 111 Orijinal metin no: [33a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Laz Mustafa Ağa’nın Sekbanbaşı Mehmed Ağa’da alacağı olduğu iddiasıyla varislerine açtığı davadan vazgeçtiği Sâbıkā Hanya ağası olup hâlâ mahmiye-i İstanbul’da Mollagürânî mahallesinde sâkin fahrü’l-emâsil Laz Mustafa Ağa b. Yusuf mahfil-i kazâda sâbıkā kul kethüdâsı olup Azak seferinde Nusret Kirman Kal‘ası muhârebesinde şehîden vefât eden Sekbanbaşı Mehmed Ağa b. Mustafa’nın evlâd-ı sıgārı Derviş Mehmed ve Pir Mehmed ve Şeyh Ahmed’in ammileri ve vasiyy-i muhtârları bâ‘isü’l-kitâb Hasan Ağa b. Mustafa mahzarında ikrâr ve takrîr-i kelâm edip bundan akdem ben Hanya ağası olduğumda müteveffâ-yı mûmâ-ileyh Mehmed Ağa kul kethüdâsı iken Hanya Ağalığı’nın dâiresi nâmına mûmâ-ileyh Mehmed Ağa sekiz yüz otuz üç guruşumu bi-gayr-ı hakkın ahz u kabz edip zimmetinde iken kable’l-edâ fevt olmağla zimmetinde hakkım kalmışidi deyü mukaddemâ meblağ-ı mezbûru terekesinden da‘vâ sadedinde olmuşidim el-hâletü hâzihi ben da‘vâ-yı mezkûreden bi’l-külliye fâriğ olup meblağ-ı mezbûr sekiz yüz otuz üç guruşa ve bi’l-cümle husûs-ı mezbûra müte‘allıka âmme-i da‘vâdan sıgār-ı merkūmûnun ve sâir veresesinin zimmetlerini ibrâ-i âmla ibrâ ve iskāt eyledim min-ba‘d husûs-ı mezbûra müte‘allıka da‘vâ ve nizâ‘ım yokdur dedikde gıbbe’t-tasdîk mâ-vaka‘a kayd-şüd. Fî 9 Safer sene 1110 Şuhûdü’l-hâl: el-Hâc Ali b. Osman, el-Hâc Halil b. el-Hâc Hasan Esirci, el-Hâc Ebubekir b. el-Hâc Ali Tophaneli, el-Hâc Mehmed b. el-Hâc Mustafa Mütevellî, Baba Yusuf b. ( ), Arnavud Mehmed Beşe b. ( ), Musa Efendi 71. Cemâ‘at, Mehmed Beşe b. Receb 35. Bölük, Sakızlı Mehmed Efendi b. ( ), Hasan Beşe b. Abdi, Hüseyin Çelebi b. Mehmed, Şeyh Mehmed Efendi Üsküdarî, el-Hâc Ahmed Beşe b. Ali.