Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 198 Hüküm no: 112 Orijinal metin no: [33b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Eskici Yusuf Beşe’nin küçük oğlu Mehmed’e nafaka takdir edildiği Mahmiye-i İstanbul’da Kocamustafapaşa mahallesinde sâkin olup bundan akdem Vilâyet-i Rumeli’de İsmailgeçidi kasabasında ticâret tarîkıyle sâkin iken vefât eden Eskici Yusuf Beşe b. Ebulkasım’ın sulbî sagīr oğlu Mehmed’in vâlidesi ve taraf-ı şer‘den mansûbe vasiyesi olan Fâtıma Hatun bt. Mahmud meclis-i şer‘-i şerîfde takrîr-i kelâm edip vasîsi olduğum sagīr-i mezbûr Mehmed nafaka ve kisveye eşedd-i ihtiyâcla muhtâc olmağın sagīr-i mezbûra babasından müntakil malından kadr-ı ma‘rûf [nafaka] farz ve takdîr olunmak matlûbumdur dedikde gıbbe’l-istihbâr hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri sagīr-i mezbûrun nafaka ve kisve ve sâir levâzım-ı mühimmesi’çün mal-ı müntakilinden beher yevm ikişer para farz ve takdîr edip meblağ-ı mefrûz-ı mezbûr yevmî ikişer parayı sagīr-i mezbûr Mehmed’in nafaka ve kisve ve sâir havâic-i zarûriyesine harc ü sarfa ve lede’l-iktizâ istidâne ve hîn-i zaferde malına rücû‘a vasiyy-i mezbûre Fâtıma Hatun’a izin vermeğin kayd-şüd. Fî gurre-i Safer sene 1110 Şuhûdü’l-hâl: Nâzır Ahmed Ağa b. Cafer Ağa, Süleyman Ağa Nâzır-ı Bezistân, Hüseyin Çelebi b. Mehmed, Mustafa Beşe b. Zülfikâr.