Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 616 Hüküm no: 762 Orijinal metin no: [135b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı İbrahim b. Hacı Cuma’nın Ahmed b. Ases’te olan alacağını tahsil etmesi Dârü’l-hilâfeti’l-behiyyeti’l-Osmâniye Kostantıniyye el-mahmiyye’de Vezir hanında sâkin tüccâr-ı zevi’l-iktidârdan el-Hâc İbrahim b. el-Hâc Cuma nâm kimesne meclis-i şer‘-i şerîf-i enverde [ve] mahfil-i dîn-i münîf-i ezherde işbu râfi‘ü’l-kitâb Ahmed b. Ases nâm kimesne mahzarında ikrâr-ı tâm ve takrîr-i kelâm edip işbu yedimde olan iki kıt‘a hüccet-i şer‘iyye nâtıka olduğu üzre mezkûr Ahmed’e üç sene mukaddem âhara bey‘ ve semenini kabz ve bana îsâl etmek üzre ücret-i ma‘lûme ile tarafımdan tevkîl ve kırk bin guruş kıymetli Acem metâ‘ı teslîm ol dahi ahz u kabz ve âhara bey‘ ve kabz-ı semen eyledikden sonra mezbûr Ahmed ile muhâsebe gördüğümüzde mezkûr Ahmed semen-i mezkûrdan beş bin sekiz yüz kırk altı esedî guruşunu kendi mesârifine sarfla istihlâk ve mâ‘adâsını bana teslîm etmekle vech-i mübeyyen üzre istihlâk eylediği meblağ-ı mezbûr beş bin sekiz yüz kırk altı esedî guruşunu mezkûr Ahmed’den da‘vâ eylediğimde beynimizde münâza‘ât-ı kesîre ve muhâsamât-ı şedîde vâki‘ olmuşidi el-hâletü hâzihî muslihûn tavassut edip da‘vâ-yı mezkûremden merkūm Ahmed ile beynimizde iki bin esedî guruş üzerine inşâ-i akd-i sulh olundukda ben dahi sulh-i mezbûru kabûl ve bedel-i sulh olan meblağ-ı mezbûr iki bin esedî guruşu mesfûr Ahmed yedinden tamâmen ahz u kabz ve tesellüm edip meblağ-ı mezbûr kırk bin esedî guruşa ve bi’l-cümle târih-i kitâba gelince beynimizde cereyân-ı mu‘âmelâta müte‘allika âmme-i da‘vâdan mezbûru ibrâ-i âmm-ı kātı‘ü’n-nizâ‘la ibrâ ve iskāt eyledim min ba‘d da‘vâ ve nizâ‘ım kalmadı dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min Şevvâli’l-mükerrem li sene seb‘a ve tis‘în ve elf. Şuhûdü’l-hâl: El-Hâc İsmail b. el-Hâc Ömer, el-Hâc Ahmed Siyamizâde?, es-Seyyid Mahmud Çelebi el-Hamîdî, es-Seyyid Abdülkerim Çelebi b. es-Seyyid Selahaddin, el-Hâc Ebûbekir b. el-Hâc Mahmud, el-Hâc Nâsır b. el-Hâc Hüseyin Bektaş Ağa, Ahmed Ağa Bâzirgânbaşı, Yusuf Efendi b. Molla Hasan, el-Hâc Osman, Süleyman Ağa b. İsmail, Mehmed Ağa sâkin-i hân-ı Vezir, Mehmed Beşe b. el-Hâc Hamza, Mehmed Haydar, Molla Abdülfettâh, Sâlih Çelebi b. el-Hâc Hüseyin, es-Seyyid Beşir Musli, Abdullah Ağa, Ömer Ağa Kethüdâ-yı Ömer Paşa, el-Hâc Mansur, Mehmed Ağa b. el-Hâc Ahmed …?, Ömer Çelebi …?.