Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 616 Hüküm no: 763 Orijinal metin no: [135b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe b. Hacı Yusuf’un Ali b. Şaban’dan muhâlaa yoluyla boşandığı Mahmiye-i İstanbul Unkapanı kurbunda Arabacılar mahallesinde sâkine olup zâtı ma‘rifet-i şer‘iyye ile ârifân Ömer Ağa b. Ali ve Ahmed Efendi b. Himmet nâm kimesneler ta‘rîfleriyle mu‘arrefe olan Ayşe b. el-Hâc Yusuf nâm Hâtun meclis-i şer‘-i hatîr-i lâzımü’t-tevkīrde zevc-i dâhili bâ‘isü hâze’l-kitâb Ali b. Şaban nâm kimesne mahzarında ikrâr ve takrîr-i kelâm edip mezbûr Ali zevcim olup zimmetinde mütekarrir ve ma‘kūdun-aleyh olan altı yüz akçe mehr-i müeccelim ve nafaka-i iddet-i mu‘ayyenem üzerlerine ve me’ûnet-i süknâm dahi kendi üzerime olmak üzre mezbûr Ali ile muhâla‘a-i sahîha-i şer‘iyye ile muhâla‘a olup ol dahi ber vech-i muharrer hul‘-ı mezbûru kabûl eylediğinden sonra hukūk-ı zevciyyete müte‘allika âmme-i da‘vâdan her birimizin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ aşer min Şevvâli’l-mükerrem li sene seb‘a ve tis‘în ve elf. Şuhûdü’l-hâl: El-Hâc? Ömer, Ahmed Efendi b. Himmet. İbrahim Çelebi b. Ahmed, Mehmed b. İdris.