Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 230 Hüküm no: 133 Orijinal metin no: [39b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani Hatun’un vefat eden eşi Mehmed Emin Efendi’de mehir bedeli alacağı olduğunu ispat ettiği Husûs-ı âti’l-beyânın mahallinde istimâ‘ ve tahrîri içün savb-ı şer‘den bi’t-taleb me’zûnen irsâl olunan Mehmed Rûşenî Efendi mahmiye-i İstanbul’da Şeyh Resmî mahallesinde sâkin iken bundan akdem vefât eden Şeyhzâde dâmadı Mehmed Emin Efendi b. Mehmed Ârif Efendi’nin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun zevce-i menkûha-i metrûkesi Ümmühani Hatun bt. Mehmed Efendi b. eş-Şeyh Süleyman Efendi husûs-ı âti’l-beyânda vekîl olduğu zât-ı mezbûreyi ma‘rifet-i şer‘iyye ile ârifân Yahya Efendi b. Mustafa Efendi ve Abdi Çelebi b. Mehmed Efendi şehâdetleriyle mahzar-ı hasm-ı câhidde sâbit olup sübût-ı vekâletine hükmolunan el-Hâc Ahmed b. Abdulkadir meclis-i ma‘kūd-ı mezbûrda müteveffâ-yı mezbûrun tesviye-i umûruna li-ecli’d-da‘vâ vasî [40a] nasb olunan Hüseyin Çelebi b. Cafer mahzarında üzerine da‘vâ ve takrîr-i kelâm edip müteveffâ-yı mezbûr Mehmed Emin Efendi b. Ârif Mehmed Efendi b. Mustafa târîh-i kitâbdan on yedi sene mukaddem tezevvüc murâd ettikde müvekkilem mezbûre Ümmühani Hatun’u iki yüz guruş mehr-i müeccel tesmiyesiyle huzûr-ı Müslimînde tezevvüc ve kabûl edip akd-i nikâh beynlerinde kāim iken meblağ-ı mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr vekîl-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden şâhidân-ı mezbûrân Yahya Efendi ve Abdi Çelebi li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Emin Mehmed Efendi b. Ârif Mehmed Efendi b. Mustafa târîh-i mezkûrda müvekkile-i mezbûre Ümmühani Hatun’u iki yüz guruş mehr-i müeccel tesmiyesiyle huzûrumuzda tezevvüc ve kabûl edip akd-i nikâh beynlerinde kāim iken vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Ahmed b. Süleyman ve İsmail b. Zülfikâr ile meclis-i şer‘a gelip alâ-vukū‘ihi inhâ etmeğin mâ-vaka‘a kayd-şüd. Fî 6 Safer sene 1110 Şuhûdü’l-hâl: Es-sâbikūn