Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 231 Hüküm no: 134 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniçeri Beytülmâl Emini Hüseyin Ağa’nın vefat eden Yeniçeri Ali Beşe’nin vasisi olduğunu ispat ettiği Mahmiye-i İstanbul’da bi’l-fi‘il yeniçeri beytülmâli emîni olan fahrü’l-eşbâh Hüseyin Ağa b. Muslu mahfil-i kazâda Dergâh-ı âlî yeniçerilerinden olup mahmiye-i mezbûrede Topkapısı kurbünde sâkin iken bundan akdem vefât eden Ali Beşe b. Abdullah’ın vech-i âtî üzere vasiyy-i muhtârı olduğunu iddi‘â eden bâ‘isü’l-kitâb Kürkçübaşı mahallesi sükkânından Abdurrahman Efendi b. Abdullah mahzarında üzerine da‘vâ ve takrîr-i kelâm edip müteveffâ-yı mezbûrun zâhirde vâris-i ma‘rûfu olmayıp cemî‘ terekesi cânib-i beytülmâle âid olmuş iken mezbûr Abdurrahman Efendi müteveffâ-yı mezbûrun mecmû‘-ı terekesini ahz u kabz ve bana teslîmden imtinâ‘ eder suâl olunsun dedikde gıbbe’s-suâl mezbûr Abdurrahman Efendi cevâbında müteveffâ-yı mezbûr Ali Beşe b. Abdullah b. Abdurrahman hâl-i kemâl-i sıhhatinde fevtinden üç ay mukaddem bi-emrillâhi te‘âlâ vefât eylediğimde vârisim olmamağla cemî‘ terekemi ahz u kabz edip levâzım-ı techîz ve tekfînimi gördükten sonra mâ‘adâsı kendi re’yinle vücûh-ı birr ü hayra sarf eyleye deyü vasiyet edip tenfîzine beni huzûr-ı Müslimînde vasiyy-i muhtâr nasb ü ta‘yîn edip musırran-aleyhâ vefât eyledi deyü def‘le mukābele ve istintâk olunsun dedikde gıbbe’l-istintâk ve’l-inkâr mezbûr Abdurrahman Efendi’den def‘-i meşrûhuna beyyine taleb olundukda udûl-ı Müslimînden mahalle-i mezbûre sükkânından Ahmed Beşe b. Osman ve Ali Beşe b. Şa‘bân li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Ali Beşe b. Abdullah b. Abdurrahman hâl-i kemâl-i sıhhatinde fevtinden üç ay mukaddem bi-emrillâhi te‘âlâ fevt olduğumda vârisim olmamağla cemî‘ terekemi ahz u kabz edip levâzım-ı techîz ve tekfînimi gördükden sonra mâ‘adâsını vücûh-ı birr ü hayra harc ü sarf eyleye deyü huzûrumuzda vasiyet edip tenfîzine işbu mezbûr Abdurrahman Efendi’yi vasiyy-i muhtâr nasb ü ta‘yîn edip ol dahi muvâcehesinde ba‘de’l-kabûl musırran-aleyhâ vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a kayd-şüd. Fî gurreti Safer sene 1110 Şuhûdü’l-hâl: Ahmed Efendi b. Mehmed, Mehmed Efendi b. Ali, Hüseyin Efendi b. Mustafa, Ahmed Çelebi b. Süleyman, İbrahim Çelebi b. Mehmed ve gayruhum.