Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 242 Hüküm no: 146 Orijinal metin no: [42a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un mehir bedelini kocası Kethüda Abdurrahman Ağa’nın terekesinden teslim aldığı Husûs-ı âti’l-beyânın istimâ‘ ve tahrîri içün savb-ı şer‘-i enverden me’zûnen irsâl olunan Mevlânâ Ali Efendi b. Abdüllatif mahmiye-i İstanbul’da Yenikapı kurbünde Evliyâ Mehmed Efendi mahallesinde sâkin iken bundan akdem vefât eden Beyhan Sultan hazretlerinin kethüdâsı Abdurrahman Ağa b. Şa‘bân’ın menziline varıp <> zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun zevce-i menkûha-i metrûkesi olup zâtı mahalle-i mezbûre ahâlîsinden İmâm Abdullah Efendi b. Mahmud ve Mehmed Ağa b. Abdurrahman ta‘rîfleriyle mu‘arrefe olan bâ‘isetü’l-kitâb Saraylı Hadîce Hatun bt. Abdülmennan meclis-i ma‘kūd-ı mezbûrda müteveffâ-yı mezbûrun evlâd-ı sıgārı Âişe ve Fâtıma ve Ahmed’in tesviye-i emrlerine kıbel-i şer‘den vasiyy-i mansûbları olmağla terekesine vaz‘-ı yed eden Ali Efendi b. Ahmed mahzarında üzerine da‘vâ ve takrîr-i kelâm edip mezbûr Abdurrrahman Ağa b. Şa‘bân b. Abdullah târîh-i fevtinden dört sene mukaddem mahrûse-i Edirne’de Vâlide Sultan kethüdâsı Yusuf Ağa’nın menzilinde beni iki yüz elli guruş mehr-i müeccel tesmiyesiyle şuhûd mahzarlarında tezevvüc ve kabûl edip akd-i nikâh beynimizde kāim iken kable’l-edâ fevt olmağla yed-i vasîde olan terekesinden taleb ederim suâl olunsun dedikde gıbbe’s-suâl vasiyy-i mezbûr cevâbında terekesine vech-i muharrer üzere [42b] vaz‘-ı yedini ikrâr ve müdde‘iye-i mezbûrenin vech-i meşrûh üzere müdde‘âsını inkâr edicek müdde‘iye-i mezbûreden sıdk-ı makāline beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Tarsus mahallesi ahâlîsinden fahrü’l-akrân Mehmed Bey b. Yusuf Ağa ve Mehmed Ağa b. Abdurrahman li-ecli’ş-şehâde meclis-i ma‘kūd-ı mezbûra hâzırân olup istişhâd olundukda fi’l-hakīka mezbûr Abdurrahman Ağa b. Şa‘bân b. Abdullah târîh-i fevtinden dört sene mukaddem tezevvüc murâd ettikde mahrûse-i Edirne’de mezbûr Kethüdâ Yusuf Ağa’nın menzilinde müdde‘iye-i mezbûre Sarayî Hadîce Hatun’u iki yüz elli guruş mehr-i müeccel tesmiyesiyle tezevvüc ve kabûl edip akd-i nikâh beynlerinde kāim iken vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm müdde‘iye-i mezbûre Sarayî Hadîce Hatun’u meclis-i ma‘kūd-ı mezbûrda vasiyy-i mezbûr Ali mahzarında ikrâr ve takrîr-i kelâm edip ânifen edâsına hükm-i şer‘î lâhık olan iki yüz elli guruş mehr-i müeccel hakkımı terekeden olmak üzere vasiyy-i mezbûr yedinden tamâmen ahz u kabz eyledim meblağ-ı mezbûrdan yedinde bir şey kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Hasan Çelebi b. Abdullah ve Hasan Bey b. Abdullah ile meclis-i şer‘a gelip alâ-vukū‘ihi inhâ etmeğin mâ-vaka‘a kayd. Fî 16 min-Safer sene 1110 Şuhûdü’l-hâl: es-Seyyid Mehmed Çelebi b. es-Seyyid Musa, Ahmed Çelebi b. Mehmed el-Müezzin, Ömer Halîfe b. Mustafa el-Müezzin, eş-Şeyh Mehmed b. Ebubekir, el-Hâc Ali b. Hasan, Mehmed Ağa b. Oruc, Süleyman Ağa b. Mahmud, Mehmed Çelebi b. Ahmed, Süleyman Çelebi b. Abdullah.