Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 617 Hüküm no: 765 Orijinal metin no: [136a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mıgırdiç v. Ovanes’in miras davasının reddi Mahmiye-i İstanbul’da Sultanhamamı kurbunda sâkin iken bundan akdem hâlik olan Karaoğlan demekle şehîr Ovanes v. Tornoz nâm Ermeni’nin verâseti sulbî kebîr oğulları Karabet ve Agop ve Mıgırdiç nâm Ermenilere ve sulbiye kebîre kızları Sultan ve Sara’ya münhasıra olduğu şer‘an zâhir ve müte‘ayyin oldukdan sonra mezbûr Mıgırdiç meclis-i şer‘-i şerîfde karındaşları mezbûrân Karabet ve Agop muvâcehelerinde üzerlerine takrîr-i da‘vâ edip babam hâlik-i mezbûr Ovanes hâl-i hayâtında zikr olunan Sultanhamamı çeşmesinde vâki‘ saka gediğini mezbûrân Karabet ve Agop’a iki yüz guruşa bey‘ ve semeninden seksen sekiz guruşunu yedlerinden ahz u kabz edip bâkī yüz on iki guruşu kable’l-ahz hâlik olmağla meblağ-ı bâkī-i mezbûr [yüz] on [iki] guruşdan bana isâbet eden hissemi mezbûr Karabet ve Agop’dan taleb ederim suâl olunsun dedikde mezbûr Mıgırdiç’in takrîr-i meşrûhu üzre bey‘-i mezbûr şer‘an sahîh olmayıp meblağ-ı mezbûrdan hissesi talebi meşrûh olmamağla mezbûrân Karabet ve Agop’a suâl dahi teveccüh etmeyip mezbûr Mıgırdiç bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min Şevvâli’l-mükerrem li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mehmed b. İdris, Hasan b. Mehmed, Ali b. Bâli.