Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 618 Hüküm no: 766 Orijinal metin no: [136a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hatun bt. Ahmed’in vârisi oğlu Mehmed’e kayyım tayin olunduğu Vilâyet-i Rumeli’nde Manastır kasabasında Kızılbey Türbesi nâm mahalleden olup mahmiye-i İstanbul’da Sahhâf Süleyman mahallesinde sâkin iken bundan akdem vefât eden Ayşe Hâtun bt. Ahmed’in verâseti zevc-i metrûkü Osman b. Mehmed ile sadrî oğlu Mehmed’e münhasıra olduğu şer‘an zâhir ve müte‘ayyin oldukdan sonra müteveffâ-yı mezbûrenin li ebeveyn kız karındaşı ve mezbûr Mehmed diyâr-ı âharda olmağla hisse-i irsiyyesini kabz ve hıfza kıbel-i şer‘den hâlâ kayyım nasb olunan Ümmügülsüm nâm hâtun ba‘de’t-ta‘rîfi’ş-şer‘î meclis-i şer‘-i hatîrde işbu bâ‘isü’l-vesîka Hüseyin Ağa b. Abdullah mahzarında ikrâr ve takrîr-i kelâm edip kız karındaşım mezbûre Ayşe bundan akdem fevt oldukda oğlum mezbûr Mehmed âhar diyârda bulunmağla terekesinden mezbûra isâbet eden hisse-i irsiyyesini kabz ve hıfza mezbûr Hüseyin taraf-ı şer‘-i şerîfden kayyım nasb olunmağla terekeden mezbûr Mehmed’e isâbet eden iki bin yedi yüz altmış dokuz akçeyi ahz u kabz ettikden sonra mezbûr Hüseyin Ağa azl olunup yerine ben kayyım nasb olunmağın meblağ-ı mezbûru merkūm Hüseyin Ağa yedinden bi’t-tamâm ahz u kabz eyledim min ba‘d bir akçe ve bir habbe bâkī kalmamışdır dedikde gıbbe’t-tasdîk vâki‘ hâl bi’l-iltimâs ketb olundu. Fi’l-yevmi’s-sâbi‘ min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Mehmed b. ( ), Mehmed b. Hasan, Mehmed Çelebi b. Mustafa, İbrahim Çelebi b. Ahmed, Ahmed Çelebi b. Yusuf.