Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 244 Hüküm no: 148 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Attar Mustafa’nın yetimlerinin hizmetini görmek ve Safiye’yi emzirmek üzere bir cariye satın alınmasına izin verildiği Mahmiye-i İstanbul’da el-Hâc Hasan mahallesi ahâlîsinden iken bundan akdem vefât eden Na‘lıncızâde demekle şehîr Attâr el-Hâc Mustafa b. Mahmud’un sulbiye-i sagīre kızları Hadîce ve Emine ve Safiye’nin tesviye-i emrlerine min-kıbeli’ş-şer‘i’ş-şerîf vasiyy-i mansûbları olan bâ‘isü’l-vesîka Attâr İbrahim Çelebi b. Mustafa meclis-i şer‘-i şerîf-i enverde bi’l-vesâye takrîr-i kelâm edip vasîsi olduğum sagīre-i mezbûre Safiye radî‘a olup bir murdi‘aya eşedd-i ihtiyâcla muhtâc olup ve mallarında müsâ‘ade olmağla sagīre-i mezbûre Safiye’yi irzâ‘ ve mezbûretân Hadîce ve Emine’ye hizmet içün müntakil mallarından müşterek olmak üzere nâzırları ma‘rifeti ve kıymet-i misli ile sâlimeten ani’l-uyûb bir dâye câriye iştirâsına kıbel-i şer‘den me’zûn olunmak bi’l-vesâye matlûbumdur dedikde vasiyy-i mezbûrun kelimât-ı meşrûhası vâkı‘a mutâbıka olduğu zeyl-i kitâbda muharrerü’l-esâmî Müslimîn haberleriyle lede’ş-şer‘i’ş-şerîf zâhir ve mukarrer olmağın hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri sagīre-i mezbûre Safiye’yi irzâ‘ ve mezbûretâna hizmet içün ber-vech-i iştirâk vech-i meşrûh üzere bir dâye câriye iştirâsına vasiyy-i mezbûra izin vermeğin kayd-şüd. Fî 15 min-Safer sene 1110 Şuhûdü’l-hâl: Osman Ağa b. Mehmed, Ali Ağa b. el-Hâc Fethullah, Ali Çelebi b. Ömer, İsmail Çelebi b. Ömer, Hasan Çelebi b. Hüseyin, Mehmed Çelebi b. Hızır, Süleyman b. Abdullah.