Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 619 Hüküm no: 767 Orijinal metin no: [136b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Çelebi b. Abdullah’ın dükkânına yaptığı masrafların kiraya sayılması Husûs-ı âti’z-zikrin mahallinde ketb u tahrîri bâbında sâdır olan fermân-ı âlîye imtisâlen bu def‘a hâssa mi‘mârlarından Mehmed Halîfe b. Abdullah ile Dârü’l-hilâfeti’l-aliyye Kostantıniyye el-mahmiyye’de Şehzâde câmi‘-i şerîfi kurbunda bir tarafdan câmi‘-i şerîf-i mezkûr ve bir tarafdan yine câmi‘-i şerîf-i mezbûrun taşra harîmî kapısına muttasıl çeşme ve iki tarafdan tarîk-i âmla mahdûd bir bâb attâr dükkânına varıp dükkân-ı mezbûra yevmî sekiz akçe icâre ile mutasarrıf olan Yusuf Çelebi b. Abdullah yine dükkân-ı mezbûrda huzûr-ı müslimînde akd olunan meclis-i şer‘-i hatîr[de] ânifen zikr olunan dükkânın mutasarrıfı olan Ali Beşe b. Mustafa tarafından husûs-ı lâhiku’l-beyâna vekîl-i şer‘îsi ve zevcesi Fâtıma Hâtun bt. Abdullah mahzarında bast-ı merâm ve takrîr-i kelâm edip dükkân-ı mezbûr bundan akdem berber dükkânı olup ben vech-i meşrûh üzre istîcâr ettiğimde müvekkil-i mezbûr Ali Beşe dükkân-ı merkūmu attâr dükkânı etmeğe bana emir edip ben dahi kendi malımla bi şarti’r-rücû‘ dükkân-ı mezbûru ta‘mîr edip attâr dükkânı ettirmişimdir hâlâ nazar olunup masrûfum keşf ve tahmîn olunmak matlûbumdur dedikde gıbbe’t-tasdîki’ş-şer‘î mi‘mâr-ı mezbûr ile keşf ve mu‘âyene olundukda fi’l-hakīka dükkân-ı mezbûrun rafları ve kepenkleri ve tahta döşemesi ve Frenk kilidleri ve tahta perdeleri ve sâir müşâhede olunan imâret ve meremmeti min haysi’l-mecmû‘ bin akçe ile kāim olur deyû mi‘mâr-ı mezbûr ve sâir ehl-i vukūf icmâ‘ ve ittifâk ettiklerinde mezbûr Yusuf Çelebi dahi vech-i meşrûh üzre râzı olup min ba‘d dükkân-ı mezbûrun binâsına müte‘allika da‘vâdan müvekkil-i mezbûrun zimmetini ibrâ ettiğinden sonra vekîl-i mezbûr Fâtıma Hâtun ile meblağ-ı mezbûr bin akçeyi beher şehr altmış akçe icâreden istîfâya mu‘âhede etmeğin mâ vaka‘a bi’t-taleb ketb olundu. Fi’l-yevm min Şevvâl sene [10]97. Şuhûdü’l-hâl: Es-Seyyid Mustafa Çelebi b. es-Seyyid Mehmed, Ebûbekir b. Himmet, el-Hâc Hasan b. el-Hâc Abdi, Mustafa b. Ali, es-Seyyid Mehmed b. Esad Çelebi.