Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 254 Hüküm no: 156 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Hatun’un varislerinden annesi Sâre Hatun’un torunu Ahmed Bey ile miras ve nafaka davasında zimmetlerini ibra ettikleri Mahmiye-i İstanbul’da Camcı Ali mahallesinde sâkine iken bundan akdem vefât eden Safiye Hatun bt. Mehmed Ağa’nın verâseti zevc-i metrûku Ali Paşa b. Abdullah ile vâlidesi Sâre Hatun bt. Abdi Efendi’ye ve sadrî oğlu Ahmed Bey’e münhasıra oldukdan sonra zâtı Mehmed Ağa b. el-Hâc Şa‘bân ve Ali Çelebi b. Eyüb ta‘rîfleriyle mu‘arrefe olan mezbûre Sâre Hatun mahfil-i kazâda müteveffât-ı mezbûrenin oğlu hâfızü’l-kitâb merkūm Ahmed Bey muvâcehesinde ikrâr ve takrîr-i kelâm edip mezbûr Ahmed Bey’in hâl-i sıgārında tesviye-i umûruna vasiye-i mansûbesi olmağla mezbûr Ahmed Bey ber-mûceb-i defter-i kassâm-ı askerî kendüye isâbet eden para üç hesâbına on yedi bin sekiz yüz altmış bir akçe hisse-i irsiyesi ile Camcı Ali mahallesinde vâki‘ menzil-i kebîrden vâlidesi müteveffât-ı mezbûrenin hissesine isâbet eden sehm-i şâyi‘ini iki bin beş yüz guruşa âhara bey‘ ve teslîm ve kabz-ı semen eylemişsin deyü meblağ-ı mezbûr iki bin beş yüz guruşu ve hâric ez defter yüz yirmi guruş kıymetli bir re’s câriye ve yüz altmış guruş kıymetli bir çift zümrüd küpe ve üç yüz guruş kıymetli bir çift mücevher bilezik ve on guruş kıymetli bir altın elmas hâtem ve beş yüz guruş kıymetli bir mücevher bütün kuşak mecmû‘u vâlidem müteveffât-ı mezbûreden irs-i şer‘le bana isâbet ve intikāl etmişdir deyü benden taleb ve da‘vâ ettikde ben dahi zikr olunan menzilden semeni olan iki bin beş yüz guruşu ahz u kabz etmedim ve câriye-i mezkûreyi hisse-i irsiyem mukābelesinde alıp âzâd eyledim ve cevâhirler benim kendi vâlidemden bana müntakil mülkümdür deyü yemîn eylediğimden sonra beynimize muslihûn tavassut edip nafaka hücceti mûcebince iddi‘â eylediğim on dört senelik nafaka-i müctemi‘a ki yevmî yirmişer paradan cem‘an iki bin beş yüz yirmi guruş da‘vâsından ben fâriğa olmak üzere kendi malımdan yüz otuz guruş mezbûr Ahmed Bey’e def‘ u teslîm eyleyip inşâ-i akd-i sulh eyledik el-hâletü hâzihi medfû‘um olan yüz otuz guruş da‘vâsından ve zikr olunan nafaka-i mefrûza da‘vâsından merkūm müteveffât-ı mezbûrenin mîrâsına müte‘allık âmme-i de‘âvî ve muhâsamâtdan mezbûr Ahmed Bey’in zimmetini ibrâ-i âmm-ı katı‘u’n-nizâ‘la ibrâ ve iskāt-ı tâm ile iskāt eyledim ba‘de’l-yevm husûs-ı mezbûra müte‘allık benden veyâ tarafımdan vekîlimden da‘vâ ve nizâ‘ sudûr ve zuhûr ederse inde’l-hükkâmi’l-kirâm mesmû‘a olmasın dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 14 min-Saferi’l-hayr sene 1110 Şuhûdü’l-hâl: Mehmed Ağa b. el-Hâc Şa‘bân, el-Hâc Abdullah b. el-Hâc Osman, Şahin Beşe b. Abdullah, Mübâşir Ahmed Beşe b. Muslu, Baltacılar Kethüdâsı Mehmed Ağa, Ali Çelebi b. Eyüb, Mehmed Ağa b. Mehmed, Ali Beşe b. Mustafa, Mehmed Efendi b. Halil, Mehmed Çelebi b. Mustafa, Müezzin Mustafa Halîfe b. Abdullah.