Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 255 Hüküm no: 157 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Hatun’un varislerinden oğlu Ahmed ile Sâre Hatun’un miras ve nafaka davasında zimmetlerini ibra ettikleri Mahmiye-i İstanbul’da Camcı Ali mahallesinde sâkine iken bundan akdem vefât eden Safiye Hatun bt. Mehmed Ağa’nın verâseti zevc-i metrûku Ali Paşa b. Abdullah ile vâlidesi Sâre Hatun bt. Abdi Efendi’ye ve sadrî oğlu Ahmed Bey’e münhasıra oldukdan sonra merkūm Ahmed Bey mahfil-i kazâda hâl-i sıgārında tesviye-i umûruna vasiye-i mansûbesi ve ceddesi olup zâtı ta‘rîf-i şer‘î ile mu‘arrefe olmağla hisse-i müntakilesine bi’l-vesâye vaz‘-ı yed eden işbu bâ‘isetü’l-kitâb ceddesi mezbûre Sâre Hatun muvâcehesinde ikrâr ve takrîr-i kelâm edip ceddem vasiyem mezbûre Sâre Hatun vâlidem müteveffât-ı mezbûrenin babası Mehmed Ağa’nın Camcı Ali mahallesinde vâki‘ menzil-i kebîrden hissesine isâbet eden sehm-i şâyi‘ini iki bin beş yüz guruşa âhara bey‘ ve teslîm ve kabz-ı semen etmekle meblağ-ı mezbûrdan hissemi ve vâlidem müteveffât-ı mezbûrenin yüz altmış guruş kıymetli inci askılı bir çift zümrüd küpeyi ve üç yüz guruş kıymetli bir çift mücevher bilezik ve on guruş kıymetli bir elmas yüz[ük] ve beş yüz guruş kıymetli bir bütün mücevher kuşak ve yüz yirmi guruş kıymetli bir re’s câriye ve ber-mûceb-i defter-i kassâm-ı askerî on yedi bin sekiz yüz altmış bir akçe hisse-i irsiyemi vasiyem mezbûre Sâre Hatun’dan ben taleb ve da‘vâ ettiğimde mezbûre Sâre Hatun cevâbında zikr olunan menzil-i kebîrden sehm-i şâyi‘ini âhara bey‘ edip lâkin kabz-ı semen etmedim <> ve zikr olunan inci askılı zümrüd küpe ve mücevher bilezik ve mücevher kuşak benim mülk-i mevrûsumdur kızım müteveffât-ı mezbûreye hîbe etmedim deyü yemîn edip ve elmas yüzük ile câriyeyi hisse-i irsiyem mukābelesinde ahz u kabz eylemişimdir ve işbu yedimde olan nafaka hücceti mûcebince yevmî yirmişer para nafaka-i mefrûzadan on dört senede iki bin beş yüz yirmi guruş nafaka-i müctemi‘a olmuşdur deyü meblağ-ı mezbûr iki bin beş yüz yirmi guruşu benden taleb ve da‘vâ edip beynimizde münâza‘ât-ı kesîre vukū‘undan sonra muslihûn tavassut edip yüz otuz guruşa inşâ-i akd-i sulh etdiklerinde ben dahi sulh-ı mezbûru kabûl ve bedel-i sulh olan meblağ-ı mezbûr yüz otuz guruşu vasiyem mezbûre Sâre Hatun yedinden tamâmen alıp kabz eyledim ba‘de’l-yevm zikr olunan menzil semeni ve zümrüd küpe ve mücevher bilezik ve mücevher kuşak ve elmas yüzük ve câriye ve ber-mûceb-i defter hisse-i irsiye da‘vâsından ve sâir mîrâsa müte‘allıka âmme-i de‘âvî ve muhâsamâtdan ben onun zimmetini ibrâ-i âmm-ı kâtı‘u’n-nizâ‘la ibrâ ve iskāt edip ol dahi [45a] nafakaya ve sâir âmme-i mîrâs da‘vâsına müte‘allık meblağ-ı mezbûr yüz otuz guruşa müte‘allık da‘vâdan benim zimmetimi ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a kayd-şüd. Fî 14 min-Saferi’l-hayr sene 1110 Şuhûdü’l-hâl: Eş-şâhidûnü’s-sâbikūn.