Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 265 Hüküm no: 163 Orijinal metin no: [46b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Macar asıllı Murtaza’nın hür olduğunu ispat edip müteveffa Drama Zabiti Hasan Bey’in kendisine vasiyet ettiği parayı teslim aldığı Kezâlik akd-i meclis-i şer‘-i şerîf ettikde müteveffâ-yı mezbûrun vech-i âtî üzere mu‘takı ve mûsâ-lehâ olduğunu iddi‘â eden işbu uzun boylu kara kaşlı kara gözlü Macariyyü’l-asl Müslimü’l-mille işbu sâhibü’l-kitâb Murtaza b. Abdullah meclis-i ma‘kūd-ı mezkûrda müteveffâ-yı mezbûrun kızları Hanife ve Fâtıma ve Âişe nâm sagīrelerin vâlideleri ve hâdineleri olup zâtı ta‘rîf-i şer‘î ile mu‘arrefe zevce-i menkûha-i metrûkesi Hadîce Hatun bt. Abdullah mahzarında üzerine da‘vâ ve takrîr-i kelâm edip seyyidim müteveffâ-yı mezbûr Hasan Bey b. Abdullah b. Abdullah’ın memlûkü olduğum hâlde fevtinden dört sene mukaddem hasbeten lillâhi’l-aliyyi’l-Hallâk huzûr-ı Müslimînde beni malından tahrîr ve i‘tâk ve silk-i ahrâr-ı asliyyîne idrâc ve ilhâk ettikden sonra bi-emrillâhi te‘âlâ fevt olduğumda sülüs-i malımdan mu‘takım Murtaza’ya yüz guruş verile deyü benim içün vasiyet ve ikrâr ve musırran-aleyhâ fevt oldukda sülüs-i malı zikr olunan yüz guruşa müsâ‘id olmağla meblağ-ı mezbûru taleb eylediğimde bana teslîmden imtinâ‘ ve terekeden olup rıkk olmak zu‘muyla bi-gayr-ı hakkın vaz‘-ı yed eder suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden mahalle-i mezbûre ahâlîsinden Halil Efendi b. Ahmed ve Mustafa Bey b. Ömer li-ecli’ş-şehâde meclis-i ma‘kūd-ı mezbûra hâzırân olup istişhâd olunduklarında fi’l-hakīka müteveffâ-yı mezbûr Hasan Bey b. Abdullah b. Abdullah fevtinden dört sene mukaddem mülkünde iken işbu müdde‘î-i mezbûr Murtaza b. Abdullah’ı hasbeten li’llâhi’l-aliyyi’l-Hallâk malından tahrîr ve i‘tâk ve silk-i ahrâr-ı asliyyîne idrâc ve ilhâk ettikden sonra bi-emrillâhi te‘âlâ fevt olduğumda sülüs-i malımdan mu‘takım mezbûr Murtaza b. Abdullah’a yüz guruş verile deyü huzûrumuzda vasiyet ve ikrâr ve musırran-aleyhâ fevt oldukda sülüs-i malı zikr olunan yüz guruşa müsâ‘iddir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm müdde‘î-i mezbûr yine meclis-i ma‘kūd-ı mezbûrda mezbûre Hadîce mahzarında ikrâr ve takrîr-i kelâm edip ânifen edâsına hükm-i şer‘î lâhık olan yüz guruş hakkımı sülüs-i terekeden olmak üzere mezbûre Hadîce Hatun yedinden tamâmen ahz u kabz eyledim meblağ-ı mezbûrdan yedinde bir şey kalmadı dedikde gıbbe’t-tasdîkı’ş-şer‘î vâki‘ hâli kezâlik inhâ ve takrîr etmeğin mâ-vaka‘a kayd-şüd. Fî 3 min-Muharremi’l-harâm sene 1110 Şuhûdü’l-hâl: Es-sâbikūn.