Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 619 Hüküm no: 768 Orijinal metin no: [136b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hayrünnisâ bt. Abdullah’ın Hüseyin Beşe b. İbrahim’den muhâlaa yoluyla boşandığı Mahmiye-i İstanbul’da Musli Ali Çelebi mahallesi sâkinelerinden olup zâtını ma‘rifet-i şer‘iyye ile ârifân Müezzin Sinan Efendi b. Ali ve Mehmed Çelebi b. Zülfikār nâm kimesneler ta‘rîfleriyle mu‘arrefe olan Hayrünnisâ bt. Abdullah nâm hâtun meclis-i şer‘-i şerîf-i enverde zevc-i dâhili bâ‘isü hâze’l-kitâb Hüseyin Beşe b. İbrahim nâm kimesne mahzarında bi tav‘ihâ ikrâr ve takrîr-i kelâm edip zevcim mezbûr Halil Beşe ile beynimizde hüsn-i zindegânîmiz olmamağla zimmetinde mütekarrir ve ma‘kūdun-aleyh olan üç bin akçe mehr-i müeccelim ve nafaka-i iddet-i mu‘ayyenem üzerlerine ve me’ûnet-i süknâm dahi kendi üzerime olmak üzre zevcim mezbûr Halil Beşe ile muhâla‘a-i sahîha-i şer‘iyye ile muhâla‘a olup ol dahi ber vech-i muharrer hul‘-ı mezbûru kabûl ettiğinden sonra hukūk-ı zevciyyete ve gayra müte‘allika âmme-i da‘vâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dedikde gıbbe’t-tasdîk mâ hüve’l-vâki‘ bi’t-taleb ketb olundu. Fî 14 min Şevvâl sene [10]97. Şuhûdü’l-hâl: Abdurrahman Efendi b. Mustafa, Müezzin Sinan Efendi b. Ali, Mehmed Çelebi b. Zülfikār, Ahmed Çelebi b. Yusuf, imâm Mehmed Efendi b. Yahya, İbrahim Çelebi b. Ahmed, el-Hâc Ahmed Çelebi b. Ali.