Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 620 Hüküm no: 769 Orijinal metin no: [136b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasib Ağa b. İbrahim’in kölesi Mustafa’yı mükâtebe yoluyla azat etmesi Itknâme Medîne-i Galata müzâfâtından kasaba-i Kasımpaşa’da sâkin Hasib Ağa b. İbrahim tarafından husûs-ı âti’z-zikri ikrâra vekîl-i müsecceli olan Mehmed Çelebi b. Hüseyin meclis-i şer‘-i şerîf-i enverde müvekkil-i mezbûra rıkk-ı sâbıkını i‘tirâf eden açık kaşlı, ala gözlü, orta boylu Rûsiyyü’l-asl bâ‘isü hâze’l-kitâb Mustafa b. Abdullah mahzarında bi’l-vekâle ikrâr-ı tâm ve takrîr-i kelâm [137a] edip müvekkilim mezbûr Hasib Ağa târih-i kitâbdan bir buçuk sene tamâmına değin kendiye hizmet edip ba‘dehû sâir ahrâr-ı asliyyîn gibi hür olmak üzre mevsûf-ı mezbûr Mustafa’yı kitâbete kat‘ edip ol dahi kabûl eyledi dedikde mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Şevvâli’l-mükerrem li sene seb‘a ve tis‘în ve elf. Şuhûdü’l-hâl: Eyyûb Beşe b. Mehmed, Abdünnebi Beşe b. Hüseyin, Şâhin b. Abdullah, el-Hâc Ahmed b. Mustafa, Hüseyin Çelebi [b.] Halil, İbrahim Çelebi b. Ahmed.