Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 295 Hüküm no: 183 Orijinal metin no: [52b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Berber Yusuf Çelebi’nin çocuklarına nineleri Tenzile’nin vasi ve İbrahim Efendi’nin nazır tayin edildikleri Mahmiye-i İstanbul’da Beyceğiz mahallesinde sâkin iken bundan akdem vefât eden Berber Yusuf Çelebi b. Osman’ın sagīr oğulları Mehmed ve Mustafa’nın tesviye-i emrlerine zevce-i menkûha-i metrûkesi Emetullah bt. Hüseyin nâm hatunun batnında müstebîn olan hamlin hisse-i mevkūfesini zabt ve hıfza kıbel-i şer‘den bir vasî nasbı lâzım ve mühim olmağın emânet ve diyânet ile ma‘rûfe olup vesâyet-i mezbûreye ehliyet ve istihkākı zeyl-i rakīmde mastûrü’l-esâmî cemâ‘at-i Müslimîn haberleriyle mukarrer olan sagīrân-ı mezbûrânın babaları müteveffâ-yı mezbûrun vâlidesi ve cedde-i sahîhaları işbu hâfızatü’l-kitâb Tenzile bt. Şa‘bân’ı hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri sagīrân-ı mezbûrânın vakt-i rüşd ü sedâdlarına varınca tesviye-i emrlerine ve haml-i merkūmun hisse-i mevkūfesini zabt u hıfza vasî ve üzerine müteveffâ-yı mezbûrun ammi İbrahim Efendi b. Hüseyin’i nâzır nasb ü ta‘yîn buyurdukda onlardan her biri dahi vesâyet ve nezâret-i mezbûreyi kabûl ve hizmet-i lâzımesini kemâ-yenbağī edâya müte‘ahhidler olmağın kayd-şüd. Fî 26 min-Safer sene 1110 Şuhûdü’l-hâl: Hüseyin Efendi b. Mustafa, Mehmed b. Hasan Efendi, Osman Efendi b. Muzaffer, Salih Çelebi b. Ahmed, Mehmed Çelebi b. Hüseyin.