Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 295 Hüküm no: 184 Orijinal metin no: [52b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani’nin vefat eden Serkâtib Ahmed Ağa’daki alacağının terekeden tahsil edilmesi Mahmiye-i İstanbul’da Balıkpazarı kurbünde sâkin Bakkāl Yani v. Yorgi nâm zimmî meclis-i şer‘-i şerîfde Dergâh-ı âlî kapıcıbaşılarından olup bundan akdem medyûnen vefât eden Ser-kâtib Ahmed Ağa b. Mustafa b. Bekir’in tesviye-i umûruna taraf-ı şer‘den vasî ve kayyım nasb olunan Mustafa Ağa b. Haydar Paşa mahzarında üzerine da‘vâ ve takrîr-i kelâm edip müteveffâ-yı mezbûr Ahmed Ağa zimmetinde işbu deyn temessüğü mûcebince bakkāl metâ‘ı bahâsından dokuz bin iki yüz yirmi dört sağ akçe hakkım olup hattâ hâl-i kemâl-i sıhhatinde Yehûd mahzarında ikrâr ve işhâd ettiğinden sonra kable’l-edâ vefât etmeğin terekesinden taleb ederim suâl olunsun dedikde gıbbe’s-suâl ve akībe’l-inkâr müdde‘î-i mezbûrdan sıdk-ı makāline beyyine taleb olundukda udûl-ı Müslimînden ve müteveffâ-yı mezbûrun etbâ‘ından Şatır İbrahim Bey b. İsmail ve diğer İbrahim b. Ahmed li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müteveffâ-yı mezbûr Ahmed Ağa b. Mustafa b. Bekir’in hâl-i kemâl-i sıhhatinde işbu deyn temessüğü mûcebince bakkāl metâ‘ı bahâsından müdde‘î-i mezbûr Yani’ye dokuz bin iki yüz yirmi dört sağ akçe vâcibü’z-zimme deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olup müdde‘î-i mezbûr Yani tahlîf-i şer‘î ile tahlîf olundukdan sonra mûcebince ba‘de’l-hükm kayd-şüd. Fî 28 min-Safer sene 1110 Şuhûdü’l-hâl: Çukacı el-Hâc Mustafa b. Hacı Mehmed, Abdullah Ağa b. Haydar Paşa, İbrahim Çelebi b. Mehmed, el-Hâc Hüseyin b. Mehmed