Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 296 Hüküm no: 185 Orijinal metin no: [52b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Efendi vefat eden Mustafa’daki sandığını vasisi İbrahim Çelebi’den teslim aldığı Mahmiye-i İstanbul’da Koruk Mahmud mahallesi ahâlîsinden olup hâlâ mahrûse-i Edirne’de Âişe Hatun Hanı kurbünde sâkin Anadolu Muhâsebesi’nde ikinci halîfe olan mefharü’l-erbâbi’t-tahrîr ve’l-kalem Hüseyin Efendi b. Kenan b. Abdullah tarafından husûs-ı âti’l-beyânda vekîl olduğu zikr olunan Koruk Mahmud mahallesi ahâlîsinden İsmail Efendi b. el-Hâc Mehmed ve Yusuf Ağa b. Dilaver şehâdetleriyle mahzar-ı hasm-ı câhidde şer‘an sâbit ve sübût-ı vekâletine hükmolunan mahalle-i mezbûrede sâkin Mehmed Çelebi b. Mahmud meclis-i şer‘-i şerîfde mahmiye-i mezbûrede Haydarpaşa mahallesinde sâkin iken bundan akdem vefât eden Na‘lıncı denmekle şehîr el-Hâc Mustafa b. Mahmud b. Abdullah’ın sagīre kızları Hadîce ve Emine ve Safiye’nin tesviye-i emrlerine kıbel-i şer‘den mansûb vasîleri olan hâfızü’l-kitâb İbrahim Çelebi b. Mustafa mahzarında bi’l-vekâle üzerine da‘vâ ve takrîr-i kelâm edip müvekkilim mezbûr Hüseyin [53a] Efendi Edirne’ye gitmezden mukaddem işbu hatmi ile mahtûm mukaffel sagīr sepet sandığını müteveffâ-yı mezbûr el-Hâc Mustafa bi-tarîkı’l-emâne îdâ‘ ve teslîm ol dahi vech-i muharrer üzere ahz u kabz edip fevt olmağla taleb eylediğimde vasiyy-i mezbûr bana teslîmden imtinâ‘ eder suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı Müslimînden şâhidân-ı mezbûrân li-ecli’ş-şehâde meclis-i şer‘a hâzırân olup istişhâd olundukda fi’l-hakīka müvekkil-i mezbûr Hüseyin Efendi târîh-i merkūmda işbu hatmi ile mahtûm mukaffel sagīr sepet sandığını müteveffâ-yı mezbûr el-Hâc Mustafa b. Mahmud b. Abdullah’a huzûrumuzda bi-tarîkı’l-emâne îdâ‘ ve teslîm edip ol dahi ahz u kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vekîl-i mezbûr Mehmed Çelebi yine meclis-i şer‘de vasiyy-i mezbûr mahzarında bi’l-vekâle ikrâr ve takrîr-i kelâm edip zikr olunan sandığı vasiyy-i mezbûr İbrahim Çelebi işbu meclis-i şer‘de bana def‘ u teslîm edip ben dahi bi’l-vekâle yedinden ahz u kabz eyledim dedikde gıbbe’t-tasdîk kayd-şüd. Fî 28 min-Safer sene 1110 Şuhûdü’l-hâl: es-Seyyid Mustafa Efendi b. Mehmed, Mehmed Çelebi b. Hasan, Hasan Bey b. Hüseyin, Halil Çelebi b. Mehmed, el-Hâc Abdi b. Cafer, Hasan Çelebi Muhzır