Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 620 Hüküm no: 770 Orijinal metin no: [137a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ahmed’in kendisini yaralayan Seyyid Mustafa Çelebi b. Seyyid İbrahim Çavuş ile sulh olması Ebü’l-feth ve’l-megāzî merhûm Sultan Mehmed Hân-ı Gāzi hazretlerinin mahmiye-i İstanbul’da vâki‘ Sahn medreselerinin birine mücâvir olan talebe-i ulûmdan Molla Mehmed b. Hüseyin b. Mehmed tarafından husûs-ı câ’i’z-zikre vekîl olduğu Hızır Efendi b. Ahmed ve Ahmed Efendi b. Ali şehâdetleriyle hasm-ı câhid-i şer‘î muvâcehesinde sâbit ve sübût-ı vekâletine hükm-i şer‘î lâhık olan Mustafa b. Mehmed meclis-i şer‘-i şerîf-i enverde mahmiye-i mezbûrda Karagümrük kurbunda Ali Paşa-yı Atîk mahallesinde sâkin işbu râfi‘ü’l-kitâb es-Seyyid Mustafa Çelebi b. es-Seyyid İbrahim Çavuş mahzarında ikrâr ve takrîr-i kelâm edip mezbûr es-Seyyid Mustafa târih-i kitâbdan dört gün mukaddem müvekkilim mezbûr Molla Mehmed’i dudakları üzerinde ve burnu dibine darb ve cerh etmekle ben dahi mûceb-i şer‘îsini cârih-i merkūmdan taleb ve da‘vâ eylediğimde beynimizde nizâ‘-ı küllî vukū‘undan sonra mezbûr es-Seyyid Mustafa Çelebi, Ali nâm cerrâha ücret-i ilâc ve bir yirmi sekiz nakid akçeden mâ‘adâ onar guruş üzerine benimle an inkâr sulh olduklarında ben dahi sulh-i mezbûru kabûl ve bedel-i sulh olan meblağ-ı mezbûru yedinden tamâmen ahz u kabz ettiğimden sonra cerâhat-i mezbûre ve mâ tehaddese minhu ve bi’l-cümle husûs-ı mezbûra müte‘allika cemî‘-i da‘vâdan mezbûr Mustafa Çelebi’nin zimmetini ibrâ ve iskāt edip ol dahi bedel-i sulhden zimmetimizi ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Ramazâni’l-mübârek li sene seb‘a ve tis‘în ve elf. Şuhûdü’l-hâl: Fahrü’l-eşbâh Mehmed Efendi Kethüdâ, fahrü’l-kuzât Abdullah Efendi, Ali Çelebi b. Mehmed, es-Seyyid İbrahim Çavuş.