Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 621 Hüküm no: 771 Orijinal metin no: [137a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil Ağa b. İbrahim’in dükkânını Mıgırdiç v. Haçuk’a kiralaması Mahmiye-i İstanbul’da Sultanhamamı kurbunda sâkin fahrü’l-emsâl Solakzâde Halil Ağa b. İbrahim meclis-i şer‘-i hatîr-i enverde mahmiye-i mezbûrda Balatkapısı dâhilinde Hoca Ali mahallesinde vâki‘ Boyacı fırını demekle ma‘rûf ekmekçi fırınının ustası olan işbu bâ‘isü’l-vesîka Mıgırdiç v. Haçuk nâm Ermeni muvâcehesinde ikrâr ve takrîr-i kelâm edip mârrü’z-zikr Balatkapısı hâricinde vâki‘ çeşmeye muttasıl olan iskemle yeri ta‘bîr olunur mülk sagīr dükkânım mukaddemâ Alibeyköyü’nde vâki‘ olan ekmekçi fırınının iskemlesi yeri olup lâkin fırın-ı mezkûr birkaç seneden beri kapanmış olmağla dükkân-ı mezbûr mu‘attal kalmağın hâlâ ben dükkân-ı mezbûru beher yevm beşer akçe ücretle mezbûr Mıgırdiç’e îcâr ve teslîm ol dahi ber vech-i mübeyyen istîcâr ve kabûl ettiğinden sonra ba‘de’l-yevm dükkân-ı mezbûr mârrü’z-zikr Boyacı fırınının iskemlesi yeri olup âhar fırın üstâdlarına îcâr olunmamak üzre ta‘ahhüd ve iltizâm eyledik dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sânî aşer min Şevvâli’l-mükerrem li sene seb‘a ve tis‘în [ve elf.] Şuhûdü’l-hâl: Mustafa Efendi el-İmâm, Ali Dede el-Müezzin b. Ahmed, Halil Çelebi b. Mehmed, kuyumcu Mehmed Çelebi b. ( ), Musli b. Bekir, Mehmed Musli b. Ali, es-Seyyid Mustafa.