Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 312 Hüküm no: 200 Orijinal metin no: [56a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hasan Çelebi’nin çocuklarına Mustafa Çelebi’nin vasi tayin edilip çocuklara nafaka takdir edildiği Mahmiye-i İstanbul’da Sofular mahallesinde sâkin iken bundan akdem vefât eden es-Seyyid Hasan Çelebi b. es-Seyyid Mehmed’in evlâd-ı sıgārı Mehmed ve Hadîce ve Emine’nin tesviye-i emrlerine kıbel-i şer‘den bir vasî nasb ü ta‘yîn olunmak lâzım ve mühim olmağla emânet ve diyânet ile ma‘rûf idiği zeyl-i kitâbda muharrerü’l-esâmî Müslimîn haberleriyle lede’ş-şer‘ zâhir olan Mustafa Çelebi b. Mahmud’u hâkim-i muvakkı‘-i sadr-ı kitâb tûbâ-lehû ve hüsnü-meâb efendi vasî nasb ü ta‘yîn buyurup ol dahi ba‘de’l-kabûl merâsimini edâya ta‘ahhüd ve iltizâm etmeğin vasiyy-i mezbûr talebiyle hâkim-i mûmâ-ileyh sıgār-ı mezbûrûn Mehmed ve Hadîce ve Emine’nin babaları müteveffâ-yı mezbûrdan müntakil mallarından târîh-i kitâbdan her birine yevmî ikişer para ki cem‘an altı para nafaka ve kisve-bahâ farz ve takdîr buyurup meblağ-ı mefrûz-ı mezbûru levâzım-ı sıgār-ı mezbûrîne harc ü sarfa ve vakt-i hâcetde istidâneye ve lede’z-zafer mallarına rücû‘a vasiyy-i mezbûra izin vermeğin kayd-şüd. Fî gurre-i şehri Rebî‘ülevvel sene 1110 Şuhûdü’l-hâl: İsmail Çelebi b. Ali, Mehmed Pîrî, Ömer Ağa b. Mehmed, İbrahim Çelebi b. Mehmed, Mehmed Beşe b. Hüseyin ve gayruhum.