Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 312 Hüküm no: 201 Orijinal metin no: [56a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pirinççi Ali’den intikal eden evi mirasçılarının satmalarına izin verildiği Mahmiye-i İstanbul’da Zeyrek mahallesinde sâkin iken bundan akdem vefât eden Pirinççi el-Hâc Ali b. Mehmed’in verâseti zevce-i menkûha-i metrûkesi Ümmühani Hatun bt. Abdullah ile sulbiye kebîre kızları Fâtıma ve Esma’ya sulbî kebîr oğlu Eyüb Çelebi’ye ve sagīre kızı Hadîce’ye ve sagīr oğlu Mustafa’ya münhasıra olduğu şer‘an zâhir ve müte‘ayyin oldukdan sonra sagīrân-ı mezbûrânın tesviye-i emrlerine vasiyy-i muhtârları bâ‘isü’l-kitâb Hüseyin Çelebi b. Mehmed meclis-i şer‘-i hatîr-ı lâzımü’t-tevkīrde <> bast-ı merâm ve takrîr-i kelâm edip müteveffâ-yı mezbûrun ile’l-vefât mülkü olup ba‘de vefâtihî zikr olunan veresesine intikāl eden mahrûse-i Galata müzâfâtından kasaba-i Kasımpaşa’da Yel Değirmeni mahallesinde vâki‘ bir tarafdan el-Hâc İbrahim b. Hasan mülkü ve bir tarafdan Keresteci Hüseyin Çelebi mülkü ve bir tarafdan diğer İbrahim Çelebi mülkü ve bir tarafdan ba‘zan Arabacı Hüseyin Çelebi mülkü ve ba‘zan tarîk-i âm ile mahdûd mülk menzilde olan hisselerini verese-i kibâr bey‘ murâd edip sagīrân-ı mezbûrânın hisselerini ifrâz mümkün olmamağla ma‘an bey‘ olunup semeni istirbâh ve istiğlâl olunmak sagīrân-ı mezbûrân hakkında enfa‘ ve evlâ olmağın zikr olunan menzilde sagīrân-ı mezbûrânın hisselerini bey‘a kıbel-i şer‘den izin verilmek matlûbumdur dedikde vasiyy-i mezbûrun kelimât-ı meşrûhası vâkı‘a mutâbık olduğu lede’ş-şer‘i’ş-şerîf zâhir ve müte‘ayyin oldukdan sonra hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri zikr olunan sagīrlerin menzil-i mahdûd-ı mezkûrda olan hisselerini verese-i kibâr hisseleriyle ma‘an semen-i misli ile âhara bey‘a vasiyy-i mezbûr Hüseyin Çelebi’ye izin vermeğin mâ-vaka‘a kayd-şüd. Fî gurre-i Rebî‘ülevvel sene 1110 Şuhûdü’l-hâl: İbrahim Çelebi b. Musa, Mahmud Beşe b. Abdurrahman, Eyüb Çelebi b. Ali, Şa‘bân Beşe b. Mustafa, Hüseyin Çelebi b. İsmail, Mehmed Beşe b. Abdullah