Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 622 Hüküm no: 772 Orijinal metin no: [137b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Musli b. Hacı Mehmed’in Ahmed Beşe b. Musa’da köle satışından kaynaklanan alacağını tahsil ettiği Mahrûse-i Galata’ya tâbi‘ kasaba-i Tophâne’de Ebülfazl mahallesi sükkânından iken bundan akdem vefât eden Ali Çelebi b. el-Hâc Musli b. el-Hâc Mehmed’in verâseti zevce-i metrûkesi Fâtıma bt. Abdülganî ile babası mezbûr el-Hâc Musli’ye vâlidesi Hanım bt. Bâli nâm hâtuna ve evlâd-ı sıgārı Mustafa ve Hanîfe ve Ayşe’ye münhasıra olduğu şer‘an zâhir ve müte‘ayyin oldukdan sonra kendi tarafından asîl ve sıgār-ı mezbûrûnun ced ve velîleri mezbûretân Fâtıma ve Hanım taraflarından husûs-ı âti’z-zikre sâbitü’l-vekâle vekîlleri olan mezbûr el-Hâc Musli meclis-i şer‘-i şerîf-i enverde sefîne reislerinden Ahmed Beşe b. Musa mahzarında asâleten ve velâyeten ve vekâleten ikrâr-ı tâm ve takrîr-i kelâm edip oğlum müteveffâ-yı mezbûrun terekesinden evsâfı beynimizde ma‘lûm Nikefora nâm bir re’s gulâm götürüp mahrûse-i Kandiye’de oğlum Hüseyin nâm kimesneye teslîm için merkūm Ahmed Beşe’ye bi tarîki’l-emâne def‘ u teslîm edip ol dahi ahz u kabz eyledikden sonra mezbûr Nikefora’yı yüz kırk guruşa âhara bey‘ ve semenini kendi mesârifine sarfla istihlâk edip ben dahi bey‘-i mezbûru mücîze olmağla semen-i mezbûr yüz kırk guruşu merkūm Ahmed Beşe bana teslîm ben dahi asâleten ve velâyeten ve vekâleten ahz u kabz ve teslîm eyledim fîmâ ba‘d meblağ-ı merkūm yüz kırk guruşdan mezbûr Ahmed Beşe’nin zimmetinde bir akçe bâkī kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî aşer min Şevvâli’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mehmed Çelebi b. İdris, Receb b. Şaban, Hasan b. Mehmed.