Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 317 Hüküm no: 206 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahbaz Hatun’un vefat eden kocası İsmail Efendi’nin vasisi olduğunu ispat ettiği Husûs-ı âti’l-beyânın mahallinde istimâ‘ ve tahrîri içün savb-ı şer‘den bi’t-taleb me’zûnen irsâl olunan Mevlânâ Abdurrahman Efendi b. el-merhûm Ahmed Efendi mahmiye-i İstanbul’da Molla Hüsrev mahallesi ahâlîsinden olup bundan akdem vefât eden İsmail Efendi b. Mehmed b. Şakir’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde müteveffâ-yı mezbûrun zevce-i menkûha-i metrûkesi ve vech-i âtî üzere vesâyetini tenfîze vasiye-i muhtâresi olduğunu iddi‘â eden zâtı ta‘rîf-i şer‘î ile mu‘arrefe olan hâfızatü’l-kitâb Şahbaz Hatun bt. Abdülvahab meclis-i ma‘kūd-ı mezbûrda müteveffâ-yı mezbûrun sagīr oğlu Mehmed ve sagīre kızı Âişe’nin tesviye-i emrlerine tashîhan li’d-da‘vâ vasî nasb olunan Yusuf b. Abdullah mahzarında üzerine da‘vâ ve takrîr-i kelâm edip zevcim müteveffâ-yı mezbûr İsmail Efendi b. Mehmed b. Şakir hâl-i marazında fevtinden on beş gün mukaddem bi-emrillâhi te‘âlâ kazâ-i nahb eylediğimde terekemden otuz beş guruş ifrâz olunup meblağ-ı mezbûr ile vech-i mesnûn üzere levâzım-ı techîz ve tekfînim görüldükden sonra bâkī kalan terekemin sülüsünden altmış guruş ifrâz olunup meblağ-ı mezbûrun on beş guruşu iskāt-ı salâtım içün fukarâya verile ve on beş guruşu hizmetimde olan Mustafa’ya verile ve on beş guruşu dahi kezâlik hizmetimde olan Ahmed’e verile ve on beş guruşu dahi mu‘takam Gülistan’a verile deyü huzûr-ı Müslimînde vasiyet edip tenfîzine ve sagīr oğlu mezbûr Mehmed ile sagīre kızı mezbûre Âişe’nin tesviye-i emrlerine vasiyy-i muhtâre ve üzerinize işbu hâzır bi’l-meclis Kavukçu Mehmed Çelebi b. Hüseyin’i nâzır nasb ü ta‘yîn ettikde biz dahi vesâyet ve nezâreti ba‘de’l-kabûl musırran-aleyhâ fevt oldukda terekesinin sülüsü meblağ mûsâ-bih-i mezbûra vâfî olmağla tenfîz-i vesâyâ murâd ederim suâl olunsun dedikde gıbbe’s-suâl ve’l-inkâr müdde‘iye-i mezbûreden sıdk-ı makāline beyyine taleb olundukda udûl-ı Müslimînden mahalle-i mezbûre ahâlîsinden Hüseyin Beşe b. İbrahim ve el-Hâc Abdullah b. Abdullah li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr İsmail Efendi b. Mehmed b. Şakir hâl-i marazında fevtinden on beş gün mukaddem bi-emrillâhi te‘âlâ kazâ-i nahb eylediğimde terekemden otuz beş guruş ifrâz olunup meblağ-ı mezbûr ile vech-i mesnûn üzere levâzım-ı techîz ve tekfînim görüldükden sonra bâkī kalan terekemin sülüsünden altmış guruş ifrâz olunup meblağ-ı mezbûrun on beş guruşu iskāt-ı salâtım içün fukarâya verile ve on beş guruşu hizmetimde olan Mustafa’ya verile ve on beş guruşu kezâlik hizmetimde olan Ahmed’e ve on beş guruşu Gülistan’a verile deyü huzûrumuzda vasiyet edip tenfîzine ve sagīrân-ı mezbûrânın tesviye-i emrlerine zevcesi müdde‘iye-i mezbûre Şahbaz’ı vasî ve üzerine işbu Mehmed Çelebi’yi hasbî nâzır nasb ü ta‘yîn ettikde onlardan her biri dahi vesâyet ve nezâreti ba‘de’l-kabûl musırran-aleyhâ fevt olmağla terekesinin sülüsü meblağ mûsâ-bih-i mezbûra kâfîdir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Çukadâr el-Hâc Süleyman ve Hasan b. Abdullah ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 2 min-şehr-i Rebî‘ülevvel sene 1110 Şuhûdü’l-hâl: Mehmed Çelebi b. Hasan, Siyavuş Ağa b. Abdullah, Mustafa Çelebi b. Ali, Abdullah Çelebi b. Siyavuş, Hasan Çelebi b. Abdullah