Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 321 Hüküm no: 209 Orijinal metin no: [57b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe’nin vefat eden Topçu İbrahim ile çocuğu Mehmed’in vasisi olduğunu ispat ettiği Husûs-ı âti’l-beyânın mahallinde tahrîr ve istimâ‘ı içün savb-ı şer‘den me’zûnen irsâl olunan el-Hâc Abdurrahman Efendi b. Mustafa Kavakhisar karşısında Yenihisar’da müstahfız iken bundan akdem vefât eden Topçu İbrahim Beşe b. Hasan’ın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun vech-i âtî üzere vasiyy-i muhtârı olduğunu iddi‘â eden Yenihisar’da sâkin bâ‘isü’l-kitâb Ahmed Beşe b. Mehmed meclis-i ma‘kūd-ı mezkûrda müteveffâ-yı mezbûrun zevce-i menkûha-i metrûkesi ve tereke-i müteveffâ-yı mezbûra bi’l-verâse vaz‘-ı yed edip zâtı hisar-ı mezbûr ahâlîsinden Yunus Çelebi b. Ali ve Ahmed Halîfe b. Nasuh ta‘rîfleriyle mu‘arrefe olan Âişe Hatun bt. Şa‘bân mahzarında üzerine da‘vâ ve takrîr-i kelâm edip müteveffâ-yı mezbûr Topçu İbrahim Beşe b. Hasan b. Abdullah fevtinden beş gün mukaddem bi-emrillâhi te‘âlâ fevt olduğumda cemî‘ terekemden evvelâ vech-i mesnûn üzere levâzım-ı techîz ve tekfînim görüle ve düyûn-ı müsbetem kazâ oluna ve ba‘de kazâi’d-düyûn bâkī malımın sülüsü ifrâz olunup sülüs-i mezkûr ile iskāt-ı salât ve hukūk-ı ibâd ve keffâret-i savmım görüle ve eyyâm-ı mübârekede tabh-ı ta‘âm ve it‘âm-ı sulehâ ve fukarâ oluna ve fazla kalırsa senin ma‘rifetinle sâir vücûh-ı birr ü hayra harc ü sarf oluna deyü vasiyet edip tenfîzine ve sagīr oğlu Mehmed’in mal-ı müntakilini vakt-i rüşd ü sedâdına varınca zabt ve hıfza ve tesviye-i umûruna beni huzûr-ı Müslimînde vasiyy-i muhtâr nasb ü ta‘yîn ettikde ben dahi muvâcehesinde vesâyet-i mezkûreyi kabûl ve merâsimini edâya müte‘ahhid oldukdan sonra musırran-aleyhâ fevt oldukda sülüs-i malını tenfîz-i vesâyâ içün ahz ve sagīr-i mezbûrun hissesini kabz murâd eylediğimde mezbûre Âişe Hatun mâni‘a olur suâl olunsun dedikde gıbbe’s-suâl mezbûre Âişe Hatun cevâbında tereke-i müteveffâ-yı mezbûra vech-i muharrer üzere vaz‘-ı yedini ikrâr ve müdde‘î-i mezbûrun vech-i meşrûh üzere müdde‘âsını inkâr edicek müdde‘î-i mezbûrdan sıdk-ı makāline beyyine taleb olundukda udûl-ı Müslimînden zikr olunan Yenihisar’da sâkin mu‘arrifân-ı mezbûrân li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Topçu İbrahim Beşe b. Hasan b. Abdullah fevtinden beş gün mukaddem bi-emrillâhi te‘âlâ fevt olduğumda evvelâ cemî‘ terekemden vech-i mesnûn [üzere] levâzım-ı techîz ve tekfînim görüle ve düyûn-ı müsbete[m] kazâ oluna ve ba‘de kazâi’d-düyûn bâkī malımın sülüsü ifrâz olunup sülüs-i mezkûr ile iskāt-ı salât ve hukūk-ı ibâd ve keffâret-i savmım görüle ve eyyâm-ı mübârekede tabh-ı ta‘âm ve it‘âm-ı sulehâ oluna ve fazla kalırsa senin ma‘rifetinle vücûh-ı birr ü hayra sarf oluna deyü vasiyet edip tenfîzine ve sagīr oğlu Mehmed’in mal-ı müntakilini zabt ve hıfza ve vakt-i rüşd ü sedâdına varınca tesviye-i umûruna işbu müdde‘î-i mezbûru huzûrumuzda vasiyy-i muhtâr nasb ü ta‘yîn ettikde ol dahi ba‘de’l-kabûl musırran-aleyhâ vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Mehmed b. Ahmed ve Mahmud b. Hüseyin ile meclis-i şer‘a gelip alâ-vukū‘ihi inhâ etmeğin kayd-şüd. Fî 3 Rebî‘ülevvel sene 1110 Şuhûdü’l-hâl: Yazıcı İbrahim Efendi b. Hüseyin, Ahmed Efendi b. Musa, Osman Bey b. Süleyman, Mustafa Beşe b. Mehmed, Ahmed Bey b. Mustafa, Osman Bey b. Süleyman, Mehmed Bey b. Hasan, Mehmed Çelebi b. Halil.