Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 622 Hüküm no: 773 Orijinal metin no: [137b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Panayot v. Nikola’nın Kiro v. İstoyani’de koyun satışından ve ödünçten alacağı olduğu Mahmiye-i İstanbul’da Zeyrek mahallesinde sâkin sütçü tâifesinden işbu râfi‘ü’l-vesîka Panayot v. Nikola nâm zimmî meclis-i şer‘-i şerîf-i enverde çoban tâifesinden Kiro v. İstoyani nâm zimmî muvâcehesinde üzerine da‘vâ ve takrîr-i kelâm edip mezbûr Kiro bundan akdem ra‘y için kendiye def‘ ve teslîm eylediğim her re’si birer guruş kıymetli altı yüz on bir re’s sağmal koyunlarımın yirmi bir re’sini bi gayri hakkın âhara bey‘ ve semenlerini kendi mesârifine sarfla istihlâk etmekle zikr olunan yirmi bir re’s koyunların kıymet-i şer‘iyyelerin mezbûr Kiro’dan ba‘de’d-da‘vâ ve’l-münâza‘a muslihûn tavassut edip da‘vâ-yı mezbûremden beynimizde on guruş üzerine akd-i sulh olundukda ben dahi sulh-i mezbûru kabûl ve mâ‘adâsına müte‘allika da‘vâdan mezbûru ibrâ ve iskāt edip bedel-i sulh-i mezbûr on guruş ile cihet-i karz-ı şer‘îden zimmetinde hakkımız olan yirmi üç guruş ki cem‘an otuz üç guruşa mezbûr Kiro’dan taleb eylediğimde bana edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Kiro cevâbında fi’l-hakīka kaziyye bâlâda tafsîl ve beyân ve şerh ve ayân olunan vech üzre olup müdde‘î-i mezbûr Panayot’a bedel-i mezbûr on guruş ile cihet-i karzdan yirmi üç guruş ki cem‘an otuz üç guruş elân zimmetinde lâzımü’l-edâ deyni idiğini tâyi‘an ikrâr ve i‘tirâf etmeğin mûcebince meblağ-ı mecmû‘-ı mezbûr otuz üç guruşu müdde‘î-i mezbûr Panayot’a edâya merkūm Kiro’ya tenbîh birle mâ vaka‘a bi’t-taleb ketb olundu. Fi’l-yevmi’l-âşir min Şevvâli’l-mükerrem li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Ebûbekir b. Hüseyin, Hüseyin b. Mehmed, Hasan b. Mehmed, Ali b. Bâli.