Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 330 Hüküm no: 220 Orijinal metin no: [59a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe’nin varisleri miras paralarını vekillleri Ahmed Beşe’den teslim aldıkları Kezâlik akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Âişe Hatun bt. Mustafa’ya ve vâlidesi Belkıs Hatun bt. Abdullah’a ve sagīre kızı Fâtıma’ya ve li-ebeveyn ammi oğlu Mustafa b. Satılmış’a ve âhar li-ebeveyn ammi oğlu Yusuf b. Abdi’ye münhasıra ve tashîh meselesi kırk sekiz sehmden olmağla sihâm-ı mezbûrenin altı sehmi zevcesi mezbûre Âişe Hatun’a ve sekiz sehmi vâlidesi mezbûre Belkıs Hatun’a ve yirmi dört sehmi sagīre-i mezbûre Fâtıma’ya ve bâkī on sehmin beş sehmi mezbûr Mustafa’ya ve beş sehmi mezbûr Yusuf’a isâbeti tahakkukundan sonra zâtları mahalle-i mezbûre ahâlîsinden es-Seyyid Mustafa Çelebi b. es-Seyyid Hasan ve el-Hâc Musa Çelebi b. Süleyman ta‘rîfleriyle mu‘arrefe olan mezbûre Belkıs Hatun ve mezbûre Âişe Hatun asâleten ve sagīre-i mezbûre Fâtıma’nın vâlidesi ve kıbel-i şer‘den mansûbe vasiyesi olmağla vesâyeten ve mezbûrân Mustafa ve Yusuf meclis-i şer‘de mahalle-i mezbûrede sâkin bâ‘isü’l-kitâb Ahmed Beşe b. Osman mahzarında her biri ikrâr ve takrîr-i kelâm edip mûrisimiz müteveffâ-yı mezbûrun mahrûse-i Edirne’de Kapan Hanı’nda sâkin olduğu odasında mevcûde terekesini ahz u kabza merkūm Ahmed Beşe’yi tarafımızdan vekîl ve nâib-i menâb nasb ü ta‘yîn etmiş idik el-hâletü hâzihi vekîl-i merkūm Ahmed Beşe Edirne’de kassâm-ı askerî mûcebince ba‘de ihrâci’l-mesârif makbûzu olan para dört akçe hesâbınca yüz altmış iki bin doksan akçeyi bize meclis-i şer‘de tamâmen def‘ [59b] u teslîm biz dahi yedinden bi-kadri’l-hısâs tamâmen alıp kabz eyledik merkūm Ahmed Beşe yedinde makbûzundan bir akçe ve bir habbe hakkımız kalmadı dediklerinde gıbbe’t-tasdîkı’ş-şer‘î vâki‘ hâli Çukadâr el-Hâc Süleyman ve Hüseyin Çelebi b. Mehmed ile inhâ ve takrîr etmeğin mâ-vaka‘a kayd-şüd. Fî 15 min-Safer sene 1110 Şuhûdü’l-hâl: Eş-şâhidûnü’s-sâbikūn.