Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 331 Hüküm no: 221 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un evini sattığı Rukiye Hatun’dan bedelini almaktan vazgeçtiği Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘den me’zûnen Mevlânâ Hüsameddinzâde Mustafa Efendi irsâl olunup ol dahi mahmiye-i İstanbul’da Sultan Selim kurbünde Çukurbostan mahallesinde sâkine Hoca Kadın denmekle meşhûre Hadîce Hatun bt. el-Hâc Ahmed b. Abdurrahman’ın menziline varıp zeyl-i kitâbda isimleri mastûr Müslimîn huzûrlarında akd-i meclis-i şer‘-i şerîf ettikde zâtı zikr olunan Çukurbostan’da sâkin İmâm Abdullah Efendi b. Ali ve Osman Çelebi b. Ahmed ta‘rîfleriyle mu‘arrefe olan mezbûre Hadîce Hatun bt. el-Hâc Ahmed b. Abdurrahman meclis-i ma‘kūd-ı mezbûrda işbu hâfızü’l-kitâb Rukiye Hatun bt. Ramazan mahzarında ikrâr ve takrîr-i kelâm edip senede Şeyh …? Vakfı’na otuz akçe mukāta‘a-i kadîmesi olup binâsı mülküm olan mahalle-i mezbûrede vâki‘ bir tarafdan Börekçi zevcesi Fâtıma Hatun menziline ve bir tarafdan Fâtıma bt. Ahmed Bey menzili ve bir tarafdan tarîk-i hâs ve bir tarafdan tarîk-i âm ile mahdûd iki bâb fevkānî oda ve bir sofa ve bir bâb tahtânî oda ve kenîf ve bahçe ve su kuyusunu müştemil mülk menzilimi târîh-i kitâbdan iki sene mukaddem mezbûre Rukiye Hatun’a yüz elli guruşa bey‘ u teslîm ol dahi iştirâ ve tesellüm edip semeni olan meblağ-ı mezbûr talebinden mezbûre Rukiye Hatun’un zimmetini ibrâ-i âmm-ı katı‘u’n-nizâ‘la ibrâ ve iskāt eyledim ba‘de’l-yevm ebniye-i menzil-i mezkûr mezbûre Rukiye’nin mülk-i müşterâsı olup keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an irsâl olunan Ahmed Çelebi b. Süleyman ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 12 Rebî‘ülevvel sene 1110 Şuhûdü’l-hâl: Mustafa Çelebi b. el-Hâc Esad, Mehmed Çelebi b. Mehmed, Hasan Çelebi b. Mustafa, Hüseyin Çelebi b. Mehmed, Mehmed b. Ahmed, Fermeneci(?) Mehmed Çelebi b. Abdullah.