Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 332 Hüküm no: 222 Orijinal metin no: [59b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un vasi Fazlullah’ı azledip yerine eşi Hasan Beşe’yi tayin ettiği Mevlânâ Mukayyid Mustafa Efendi menzil-i mezbûrda akd-i meclis-i şer‘-i şerîf ettikde zâtı ta‘rîf-i şer‘î ile mu‘arrefe olan mezbûre Hadîce Hatun bt. el-Hâc Ahmed b. Abdurrahman meclis-i ma‘kūd-ı mezkûrda işbu hâfızü’l-kitâb zevci Hasan Beşe b. Mahmud mahzarında ikrâr ve takrîr-i kelâm edip bi-emrillâhi te‘âlâ fevt olduğumda tereke-i menkūlemin(?) sülüsü ifrâz olunup sülüs-i mezkûrdan bin bir akçe iskāt-ı salâtıma ve rûhum içün dört hatm-i şerîf tilâvet edenlere rızâen lillâh birer guruş verile ve eyyâm-ı mübârekede kadr-ı kifâye tabh-ı ta‘âm ve it‘âm-ı fukarâ ve sulehâ oluna deyü vasiyet edip tenfîzine vârisim olan vâlidem Fâtıma’nın li-ümmin karındaşı Süleyman’ın oğlu Osman kızı Afife’nin oğlu Fazlullah’ı vasiyy-i muhtâr nasb etmişdim el-hâletü hâzihi mezbûr Fazlullah’ı vesâyet-i mezbûreden rücû‘ ve ma‘zûl edip yerine vesâyâ-yı mezkûreden fazlasını vücûh-ı birr ü hayra sarfa re’yine izâfet ile zevcim mezbûr Hasan Beşe’yi vech-i muharrer üzere vasiyy-i muhtâr nasb ü ta‘yîn eyledim dedikde ol dahi vesâyet-i mezbûreyi kabûl ve merâsimini edâya müte‘ahhid olmağın vâki‘ hâli kezâlik inhâ etmeğin kayd-şüd. Fî 11 Rebî‘ülevvel sene 1110 Şuhûdü’l-hâl: Eş-şâhidûnü’s-sâbikūn.