Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 623 Hüküm no: 774 Orijinal metin no: [137b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Abdullah’ın Gülistan bt. Abdullah’ta mal satışından alacağı olduğu Mahmiye-i İstanbul’da Kırkçeşme kurbunda sâkine Hatice bt. Abdullah nâm hâtun ba‘de’t-ta‘rîfi’ş-şer‘î meclis-i şer‘-i şerîf-i enverde Gülistan bt. Abdullah nâm hâtun mahzarında üzerine da‘vâ ve takrîr-i kelâm edip mezbûre Gülistan ile şerîki gāibe ani’l-meclis Hâmide zimmetlerinde yedimden müşterâ ve makbûz iki zümrüd küpe ve bir hâtem ve üç gömleklik bez bahâlarından altı guruş hakkım olup meblağ-ı mezbûrdan her biri âharın zimmetine lâzım gelen meblağı ahz ve kabûlü hâviye kefâlet-i sahîha-i şer‘iyye ile kefîl olmağın hâlâ mezbûre Gülistan’a suâl olunup meblağ-ı mezbûrun alıverilmesi matlûbumdur dedikde gıbbe’s-suâl ve akībe’l-inkâr müdde‘iye-i mezbûrdan müdde‘âsına beyyine taleb olundukda zât-ı mezbûreyi ma‘rifet-i şer‘iyye ile ârifân udûl-i müslimînden Mehmed b. Musa nâm kimesne ile Ayşe bt. Ahmed ve Fâtıma bt. Hacı ve Fâtıma bt. el-Hâc Hasan [138a] ve Ümmühâni bt. Mehmed nâm hâtunlar li ecli’ş-şehâde meclis-i şer‘a hâzırûn olup [isre’l-]istişhâd fi’l-vâki‘ müdde‘iye-i mezbûre Hatice Hâtun bundan akdem iki zümrüd ve bir hâtem ve üç gömleklik bezi gāibe-i mezbûre Hâmide ile şerîki işbu mezbûre Gülistan’a elli esedî guruşa bizim huzûrumuzda bey‘ ve teslîm anlar dahi iştirâ ve kabûl eylediklerinden sonra mezbûrdan her biri âharın zimmetine lâzım gelen meblağa kefâlet-i sahîha-i şer‘iyye ile kefîl olmuşidi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri makbûle olmağın mûcebiyle ba‘de’l-hükm meblağ-ı mezbûr elli guruşu asâleten ve vekâleten müdde‘iye-i mezbûreye edâ ve teslîme mezkûre Gülistan’a tenbîh olunup mâ vaka‘a bi’t-taleb ketb olundu. Fi’l-yevmi’s-sâlis min Şevvâli’l-mükerrem li sene seb‘a ve tis‘în ve elf. Şuhûdü’l-hâl: Mustafa Çelebi b. Ahmed, İbrahim Çelebi b. Ahmed, Mehmed b. İdris, Ali [b.] Bâli.