Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 342 Hüküm no: 233 Orijinal metin no: [61b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nalbur Mustafa’nın varislerinin, murislerinin alacaklarının tahsili için Nalbur Hasan Çelebi’yi vekil tayin ettikleri Husûs-ı âti’l-beyânın mahallinde tahrîri iltimâs olunmağın savb-ı şer‘den irsâl olunan Mevlânâ es-Seyyid Abdülmuti Efendi mahmiye-i İstanbul’da Kumkapı kurbünde Cerrâh İshak Bey mahallesinde sâkin iken bundan akdem vefât eden Na‘lbur el-Hâc Mustafa b. Ahmed b. Abdurrahman’ın hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde müteveffâ-yı merkūm el-Hâc Mustafa’nın verâseti zevce-i metrûkesi Hadîce Hatun bt. el-Hâc Hüseyin b. Mehmed’e ve sulbî sagīr oğlu Mehmed Çelebi ve sulbiye sagīre kızı Kerime’ye münhasıra ve mezbûre Hadîce Hatun evlâdı sagīrân-ı mezbûrânın tesviye-i umûrlarına min-kıbeli’l-ebb vasiye-i muhtâreleri olduğu şer‘an sâbit ve mütehakkık oldukdan sonra zâtını ma‘rifet-i şer‘iyye ile ârifûn mahalle-i mezbûre imâmı Halil Efendi b. Abdullah ve Müezzin Hüseyin Efendi b. Mehmed ve Ahmed Bey b. Süleyman ta‘rîfleriyle mu‘arrefe olan mezbûre Hadîce Hatun meclis-i ma‘kūd-ı mezbûrda hâlâ zevci olan işbu bâ‘isü’l-kitâb Na‘lbur Hasan Çelebi b. Mehmed mahzarında asâleten ve vesâyeten ikrâr ve takrîr-i kelâm edip mûrisimiz müteveffâ-yı mezbûr el-Hâc Mustafa’nın işbu defter-i kassâm-ı askerî mûcebince İstanbul’da ve Anadolu’da ve Rumeli’nde demir bahâsından ve sâir mu‘âmelâtdan zimem-i nâsda olan hukūkunu ve benim dahi müstakillen olan hukūkumu erbâbından taleb ve da‘vâ ve ahz u kabza ve bana îsâle ve lede’l-iktizâ hükkâm-ı kirâmda mürâfa‘a ve muhâsamaya ve bi’l-cümle cüz’î ve küllî umûrumu görmeğe tarafımdan zevcim mezbûr Hasan Çelebi’yi vekîl ve nâib-i menâb nasb ü ta‘yîn eyledim dedikde mezbûr Hasan Çelebi dahi vekâlet-i mezbûreyi kabûl ve hizmet-i lâzımesini kemâ-yenbağī edâya ta‘ahhüd ve iltizâm etmeğin vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan Çukadâr Nasuh Beşe b. Abdi ve Hüseyin Çelebi b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 15 Rebî‘ülevvel sene 1110 Şuhûdü’l-hâl: Fahrü’l-hutebâ Abdullah Efendi b. Ahmed, Fahrü’l-eimme Halil Efendi b. Abdurrahman, Abdurrahman Çelebi b. İsmail, Ahmed Bey b. Süleyman, Ali Çelebi b. Mehmed, el-Hâc İbrahim b. Şa‘bân İznikmidli.