Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 343 Hüküm no: 234 Orijinal metin no: [62a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Kadı Şirvanîzade Mustafa Efendi’nin eşi Fatıma Hatun’un tereke hissesini ve Ali Efendi’nin kendisine vasiyet edilen parayı Abdullah Ağa’dan teslim aldıkları Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘den me’zûnen Mevlânâ Mukayyid Mustafa Efendi b. Mehmed irsâl olunup ol dahi mahmiye-i İstanbul’da Molla Şeref mahallesi ahâlîsinden Mısr-ı Kāhire kuzâtından olup Dimyat kazâsından ma‘zûlen gelirken Bulak nâm mevzi‘de vefât eden Şirvanîzâde Mustafa Efendi b. Ahmed Efendi’nin verâseti zevce-i menkûha-i metrûkesi Fâtıma Hatun bt. el-merhûm Ahmed Efendi ile mahmiye-i mezkûrede Tevkī‘î Cafer Çelebi mahallesinde sâkine li-ebeveyn hâli Hadîce bt. Sahhâf Mehmed Efendi b. Abdi Efendi’ye münhasıra olup tashîh meselesi dört sehmden olmağla sihâm-ı mezbûrenin bir sehmi mezbûre Fâtıma’ya ve üç sehmi mezbûre Hadîce’ye isâbet ettikden sonra zâtı Ali Efendi b. Süleyman ve Mahmud Efendi b. Ömer ta‘rîfleriyle mu‘arrefe olan mezbûre Fâtıma Hatun bt. el-merhûm Ahmed Efendi meclis-i ma‘kūd-ı mezbûrda husûs-ı âti’l-beyânda müseccel vekîli işbu hâfızü’l-kitâb Abdullah Ağa b. el-Hâc Mehmed Ağa mahzarında ikrâr ve takrîr-i kelâm edip zevcim müteveffâ-yı mezbûrun terekesi tahrîr ve ba‘de ihrâci’l-mesârif ve’s-sülüs defter-i kassâm-ı askerî mûcebince mezbûr Abdullah Ağa’nın vaz‘-ı yed eylediği terekesinden tashîh-i mezbûr üzere para üç akçe hesâbınca bana isâbet eden on dokuz bin sekiz yüz on sekiz akçe hakkımı merkūm Abdi [Abdullah] Ağa yedinden tamâmen ahz u kabz eyledim dedikde gıbbe’t-tasdîk ve müteveffâ-yı mezbûrun sülüs-i malını kabza vasiyy-i muhtârı olan mezbûr Ali Efendi b. Süleyman meclis-i ma‘kūd-ı mezbûrda merkūm Abdi [Abdullah] Ağa mahzarında bi’l-vesâye ikrâr ve takrîr-i kelâm edip ben dahi defter-i mezkûr mûcebince müteveffâ-yı mezbûrun para üç akçe hesâbınca sülüs-i malı olan otuz dokuz bin altı yüz otuz akçe bi-hasebi’l-vesâye yedinden tamâmen ahz u kabz eyledim sülüs-i mezbûrdan mezbûr Abdi [Abdullah] Ağa yedinde bir akçe ve bir habbe bâkī kalmadı dedikde gıbbe’t-tasdîk vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Hüseyin Çelebi b. Mehmed ile meclis-i şer‘a gelip alâ-vukū‘ihi inhâ etmeğin mâ-vaka‘a kayd-şüd. Fî 7 Zilka‘de sene 1109 Şuhûdü’l-hâl: Şeyh Mehmed Efendi b. Sunullah, Ali Bey b. Süleyman, Osman Çelebi b. Ali, Mustafa Çelebi b. Mehmed, Mustafa Efendi b. Hüsameddin, Ali Ağa b. el-Hâc Mustafa, Süleyman Efendi b. Mustafa.