Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 624 Hüküm no: 775 Orijinal metin no: [138a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Divriği kazasının 1097-1098 seneleri cizyesinin tahsili fermanı Vilâyet-i Divriği ve karye-i Pınar ve İstanbul ve Pazarköyü ve İznikmid ve Yalakābâd ve tevâbi‘inde vâki‘ Divriği defteri keferesinin bin doksan yedi Ramazanı gurresinden bin doksan sekiz Şa‘bânı gāyesine değin üzerlerine edâsı lâzım gelen cizyeleri cem‘ ve tahsîl olunmak lâzım ve mühim olmağın ( ) der-uhde olunup eline mühürlü ve tuğrâlı cizye defteri sûreti verilmeğin zamânı hulûl eyledikde mûcebince cem‘ ve tahsîl ettirilmek emr edip buyurdum ki hükm-i şerîfimle mübâşir-i mezbûr vardıkda siz ki kadılar defter-i mezbûra tâbi‘ kefere tâifesinin asıl iki bin altmış dokuz cizyehâneleri olup târih-i mezbûra mahsûb olmak üzre bin sekiz yüz on üç hânelerinde ikişer yüz altmış beşer akçe ve iki yüz elli altı hânelerinden ikişer yüz elli beşer akçe mîrî cizyelerinin irsâl olunan mühürlü ve tuğrâlı cizye defteri mûcebince zamânı hulûl eyledikde cem‘ ve tahsîl ettirilip kimesneye ta‘allül ve nizâ‘ ettirmeyesiz ve bundan mâ‘adâ mübâşir-i mezbûrun cihet-i ma‘îşeti için her bir hânelerinden kırk akçe dahi aldıralar ve bundan ziyâde bir akçe ve bir habbe alınmaya ve aldırmayasız ve hîn-i tahsîlde alınan esedî guruşu yüz sekizer akçeye aldırıp ziyâdeye ve noksân aldırmayasız, ammâ tamâm ihtimâm edip kesr-i defterden noksân cizyeden ve fermândan ziyâde talebiyle zulm ve te‘addîden be gāyet ihtirâz eyleyesiz ve cizye-i mezbûre Saray-ı atîk-i ma‘mûre mühimmâtiyçün ocaklık ta‘yîn olunmuşdur şöyle bilesiz alâmet-i şerîfe i‘timâd kılasız. Tahrîren fi’l-yevmi’r-râbi‘ aşer [min] şehri Rebî‘ilevvel sene sitte ve tis‘în ve elf. Be sahrâ-yı Edirne.