Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 345 Hüküm no: 236 Orijinal metin no: [62b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un eşi İbrahim’den muhâlaa yoluyla boşandığı Husûs-ı âti’l-beyânın mahallinde ketb ü tahrîri iltimâs olunmağın bu fakīr? hâlâ İstanbul’da kāimmakām-ı sadrazamî düstûr-ı mükerrem müşîr-i müfahham sa‘âdetlü Yusuf Paşa hazretlerinin Demirkapı kurbünde vâki‘ sâkin olduğu saraya varıp huzûr-ı âlîlerinde akd-i meclis-i şer‘-i şerîf olundukda mahmiye-i mezbûrede Bostancıbaşı Ali Ağa mahallesi ahâlîsinden olup bundan akdem vefât eden Aşçıbaşı Ahmed Ağa b. Receb’in kebîre kızı olup zâtı Murad Ağa b. İbrahim ve el-Hâc İbrahim b. Ahmed ta‘rîfleriyle mu‘arrefe olan Fâtıma Hatun bt. ( ) meclis-i ma‘kūd-ı mezbûrda zevc-i dâhili el-Hâc İbrahim b. Ali mahzarında ikrâr ve takrîr-i kelâm edip zevcim mezbûr el-Hâc İbrahim ile beynimizde hüsn-i mu‘âşeretimiz olmamağla zimmetinde mütekarrir olan beş yüz guruş mehr-i müeccelimden fâriğa olup nafaka ve iddetim ve me’ûnet-i süknâm dahi kendi üzerime olmak üzere mezbûr el-Hâc İbrahim ile muhâla‘a-i sahîha-i şer‘iyye ile muhâla‘a eyledim dedikde ol dahi hul‘-ı mezbûru kabûl etmeğin mâ hüve’l-vâki‘ bi’t-taleb ketb olundu. Fî 13 Rebî‘ülevvel sene 1110 Şuhûdü’l-hâl: Umdetü’l-mevâlî Hasan Efendi el-Kādı-i Yenişehr sâbık, Umdetü erbâbi’t-tahrîr ve’l-kalem Fethullah Efendi Reisülküttâb, Umdetü’l-emâcid ve’l-a‘yân Şa‘bân Ağa, Mefharü erbâbü’t-tahrîr ve’l-kalem Mehmed Efendi Emîn-i şehr, Abdullah Efendi b. Şa‘bân İmâm-ı Paşa, Korgun(?) Mustafa Ağa Emîn-i beytülmâl, Hasan Efendi b. Mehmed İmâm-ı Hocapaşa, es-Seyyid Yakub Efendi b. Hoca Şah, Halil Ağa b. Hüseyin an-mahalle-i Karaki.