Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 361 Hüküm no: 244 Orijinal metin no: [66a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah Hatun’un vefat eden kocası Ahmed Odabaşı’nda mehir bedeli alacağı olduğunu ispat ettiği Mahmiye-i İstanbul’da Sarıgez (Sarıgörez) mahallesinde sâkin iken bundan akdem vefât eden Ahmed Odabaşı b. Mehmed’in zevce-i menkûha-i metrûkesi olup zâtı mahalle-i mezbûre ahâlîsinden Abdullah Efendi b. Mehmed ve Musa Çelebi b. Mehmed ta‘rîfleriyle mu‘arrefe olup bâ‘isetü’l-kitâb Emetullah Hatun bt. Mehmed mahfil-i kazâda müteveffâ-yı mezbûrun li-ebin kız karındaşı olmağla terekesine bi’l-verâse vâzı‘atü’l-yed olup zâtı ta‘rîf-i şer‘î ile mu‘arrefe olan Emetullah Hatun mahzarında üzerine da‘vâ ve takrîr-i kelâm edip müteveffâ-yı mezbûr Ahmed Odabaşı b. Mehmed b. Abdullah fevtinden on sene mukaddem tezevvüc murâd eyledikde beni sekiz bin sağ akçe mehr-i müeccel tesmiyesiyle huzûr-ı Müslimînde tezevvüc ve kabûl edip akd-i nikâh beynimizde kāim iken mehr-i mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘iye-i mezbûreden sıdk-ı makāline beyyine taleb olundukda udûl-ı ahrâr-ı ricâl-i Müslimînden şâhidân-ı mezbûrân Abdullah Efendi b. Mehmed ve Musa Çelebi b. Mehmed li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Ahmed Odabaşı b. Mehmed b. Abdullah fevtinden on sene mukaddem işbu müdde‘iye-i mezbûreyi sekiz bin sağ akçe mehr-i müeccel tesmiyesiyle huzûrumuzda tezevvüc ve kabûl edip akd-i nikâh beynlerinde kāim iken vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm kayd-şüd. Fî 10 min-Rebî‘ülevvel sene 1110 Şuhûdü’l-hâl: el-Hâc) Mehmed Efendi, Yahya Efendi b. Mustafa, Mehmed Efendi b. Mahmud, İbrahim Çelebi b. Mehmed, Şa‘bân Beşe b. Mehmed ve gayruhum.