Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 624 Hüküm no: 776 Orijinal metin no: [138b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Edirne Rum metrepolidinin borçlarının ertelenmesi hükmü A‘lemü’l-ulemâ’i’l-mütebahhirîn, efdalü’l-fuzalâ’i’l-müteverri‘în, yenbû‘ü’l-fazli ve’l-yakīn, keşşâfü’l-müşkilâti’d-dîniyye, hallâlü’l-mu‘dilâti’l-yakīniyye miftâhu künûzi’l-hakāyık ve misbâhu rumûzi’d-dekāyık el-mahfûfu bi sunûfi avâtıfi’l-meliki’l-a‘lâ Anadolu kazaskerliği pâyesiyle bi’l-fi‘l İstanbul kadısı olan İbrahim -edâmallâhu te‘âlâ fezâilühû- ve akzâ kuzât[i’l-müslimîn evlâ] vülâti’l-muvahhidîn, ma‘denü’l-fazli ve’l-yakīn, hüccetü’l-hakkı ale’l-halkı ecma‘în, vârisü ulûmi’l-enbiyâ’i ve’l-mürselîn, el-muhtas bi mezîdi inâyeti’l-meliki’l-Mu‘în Mevlânâ Edirne kadısı -zîde fezâilühû- tevkī‘-i refî‘-i hümâyûn vâsıl olucak ma‘lûm ola ki Edirne’de vâki‘ Rum kefere tâifesinin metrepolidi Mitrokopos? nâm râhib Ordu-yı hümâyûnuma arzuhâl edip seksen kese akçeden ziyâde deyne mübtelâ olup def‘aten edâya iktidârı olmamağla bundan akdem vakıfdan mâ‘adâ murâbahalı deynleri her sene îrâdlarına gidip ber vech-i taksît tedrîcle verilmek üzre vârid olan emr-i şerîfim mûcebince ashâb-ı düyûna senede guremâdan hisselerine isâbet ettiği mertebe vermeğe râzı iken ba‘zıları kanâ‘at eylemeyip temessükât mûcebince akçemizi tamâmen ver yedimizde emrimiz vardır sen ve kefîl olan vekîlleri ahz ve haps ettiririz deyû ziyâde rencîde ve remîdeden hâlî olmadıkların ve bu bâbda şeyhülislâmdan da‘vâsına muvâfık fetvâ-yı şerîfesi olduğun bildirip mûcebince amel olunup ol vechile te‘addîleri men‘ ü def‘ olunmak bâbında hükm-i hümâyûnum recâ etmeğin husamâsıyla mürâfa‘a-i şer‘ ve bu âna değin aldıkları murâbahayı asl-ı mâla zam eyleyip ve bâkī kalan deynini dört seneye değin edâ eylemek üzre taksît ve defter eyledikden sonra Ordu-yı hümâyûnuma arz eylemeniz emrim olmuşdur. Buyurdum ki hükm-i şerîfimiz vusûl buldukda bu bâbda sâdır olan emrim üzre amel edip dahi husamâsıyla mürâfa‘a-i şer‘ ve bu âna değin aldıkları bilâ-ihrâc cemî‘ murâbahayı asl-ı mâla zam eyleyip mahsûb ve ba‘de’l-yevm murâbaha taleb ettirmeyip [139a] bâkī kalan deyni dört seneye değin edâ eylemek üzre taksît ve emreyledikden sonra yazıp Ordu-yı hümâyûnuma arz ve i‘lâm edip vakıf talebiyle elimizde emrimiz vardır deyû rencîde ettirmeyip ve yedinde olan fetvâ-yı şerîfe[ye] muhâlif sen ve kefîl olan zimmîleri haps ettiririz deyû te‘addî ettirmeyesin şöyle bile[siz] ve ba‘de’n-nazar bu hükm-i hümâyûnum yerinde icrâ edip alâmet-i şerîfe i‘timâd kılasız. Tahrîren fî evâsıtı şehri Recebi’l-ferd li sene seb‘a ve tis‘în ve elf. Be yurd-ı sahrâ-yı Kemal Çayırı.