Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 363 Hüküm no: 246 Orijinal metin no: [66b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehit Mısırlızade İbrahim Paşa’nın borçlularına verilmek üzere İstanköy’deki emlâkinin satışına izin verildiği Anadolu beylerbeyisi iken sene-i sâbıkada sefer-i hümâyûnda şehîden vefât eden merhûm Mısırlızâde İbrahim Paşa b. Ali’nin sagīr oğlu Abdullah Bey ve sagīre kızı Âişe Hanım’ın vasiyy-i mansûbu hâfızü’l-kitâb Mustafa Efendi b. el-Hâc Mustafa mahfil-i kazâda takrîr-i kelâm edip merhûm-ı mezbûrun tereke-i menkūlesi düyûn-ı müsbetesine vefâ etmeyip emlâkinin dahi bey‘i lâzım gelmeğin cezîre-i İstanköy’de vâki‘ bahçe ve menzil ve mandıra içinde mevcûd ağnâmı ve mahzen ve bağı ve sâir emlâkinin mahallerinde ba‘de’l-müzâyede semeni ile âhara bey‘a izin taleb ederim dedikde vasiyy-i mezbûrun kelimât-ı meşrûhası vâkı‘a mutâbık olmağın hâkim-i muvakkı‘-i sadr-ı kitâb hazretleri vech-i muharrer üzere emlâk-ı mezbûreyi semen-i misli ile ba‘de’l-müzâyede âhara bey‘a vasiyy-i mezbûra izin vermeğin mâ-vaka‘a bi’t-taleb kayd-şüd. Fî gurre-i Muharremi’l-harâm li-sene 1110 Şuhûdü’l-hâl: Es-sâbikūn.