Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 363 Hüküm no: 247 Orijinal metin no: [66b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Receb’in vefat eden Saraç Mehmed Çelebi’de alacağı olduğunu ispat ettiği Fi’l-asl Vilâyet-i Anadolu’da Gerede kasabası ahâlîsinden olup mahmiye-i İstanbul’da Mercan sûkunda vâki‘ handa müsâfiren sâkin bâ‘isü’l-kitâb el-Hâc Receb b. Ahmed meclis-i şer‘-i hatîr-ı lâzımü’t-tevkīrde mahmiye-i mezbûrede Laleliçeşme kurbünde sâkin iken bundan akdem vefât eden Saraç Mehmed Çelebi b. Receb’in vâlidesi ve terekesine bi’l-verâse vâzı‘atü’l-yed olup zâtı ta‘rîf-i şer‘î ile mu‘arrefe olan Hadîce Hatun bt. Abdullah mahzarında üzerine da‘vâ ve takrîr-i kelâm edip vekîlim olan gāib ani’l-meclis Hacı Musa oğlu Mustafa Beşe nâm kimesne malımdan kırk altı aded köseleyi müteveffâ-yı mezbûr Saraç Mehmed Çelebi b. Receb b. Abdullah’a seksen buçuk guruşa tarafından vekâleten bey‘ u teslîm ol dahi ber-vech-i muharrer iştirâ ve tesellüm ve kabûl edip semeni olan meblağ-ı mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı Müslimînden fi’l-asl kazâ-i mezbûr ahâlîsinden olup han-ı mezbûrda müsâfiren sâkin Abdurrahman b. Veli ve Zeynelabidin b. Halil li-ecli’ş-şehâde meclis-i şer‘a hâzırân [olup] isre’l-istişhâd fi’l-hakīka müdde‘î-i mezbûr el-Hâc Receb vekîli gāib ani’l-meclis mezbûr Mustafa Beşe müdde‘î-i mezbûrun malından kırk altı köseleyi müteveffâ-yı mezbûr Saraç Mehmed Çelebi b. Receb b. Abdullah’a her biri yedişer rub‘a olmak üzere seksen buçuk guruşa vekâleten bey‘ u teslîm ol dahi vech-i muharrer üzere iştirâ ve tesellüm ve kabûl eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm kayd-şüd. Fî 16 Rebî‘ülevvel sene 1110 Şuhûdü’l-hâl: Abdurrahman Efendi b. el-müvellâ el-merhûm Ahmed Efendi, Ahmed Çelebi b. Süleyman, Hâfız Mehmed Efendi, el-Hâc Süleyman Çukadâr, İbrahim Çelebi b. Mehmed, Mehmed Çelebi b. Ali.