Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 371 Hüküm no: 255 Orijinal metin no: [68a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden İsmail Efendi’nin küçük çocuklarına nafaka takdir edildiği Mahmiye-i İstanbul’da Molla Hüsrev mahallesinde sâkin iken bundan akdem vefât eden İsmail Efendi b. Mehmed’in sagīr oğlu Mehmed ve sagīre kızı Âişe’nin tesviye-i emrlerine vasiye-i muhtâreleri vâlideleri hâfızatü’l-kitâb Şahbaz Hatun bt. Abdullah talebiyle sagīrân-ı mezbûrânın nafaka ve kisveleri’çün târîh-i kitâbdan hâkim-i muvakkı‘-i sadr-ı kitâb tûbâ-lehû ve hüsnü-meâb hazretleri mal-ı müntakillerinden sagīr-i mezbûr Mehmed’e yevmî yirmi sağ akçe ve sagīre-i mezbûre Âişe’ye dahi yevmî on sağ akçe nafaka ve kisve-bahâ farz ve takdîr buyurup meblağ-ı mefrûz-ı mezbûr yevmî otuz sağ akçeyi sagīrân-ı mezbûrânın nafaka ve kisve ve sâir levâzım-ı zarûriyelerine harc ü sarfa ve vakit-i hâcetde istidâneye ve lede’z-zafer mallarına rücû‘a vasiye-i mezbûreye izin vermeğin mâ-vaka‘a bi’t-taleb ketb olundu. Fi’l-yevm 15 [min-Rebî‘ülevvel] sene 1110 Şuhûdü’l-hâl: Mehmed Çelebi b. Mahmud, Abdullah Çelebi b. Abdullah, Mustafa b. Ahmed, Ahmed b. Mehmed, Hasan b. Abdullah ve gayruhum.