Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 371 Hüküm no: 256 Orijinal metin no: [68a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arslan Yahudi’nin vefat eden Abdurrahman Ağa’da alacağı olduğunu ispat ettiği Zikri âtî husûsun mahallinde istimâ‘ ve tahrîri içün bi’l-iltimâs cânib-i şer‘den me’zûnen irsâl olunan Mevlânâ Mehmed Efendi b. Mahmud mahmiye-i İstanbul’da el-Hâc Evliyâ mahallesinde Sarayî Hadîce Hatun bt. Abdullah’ın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde Gelibolulu cemâ‘atinden işbu bâ‘isü’s-sifr Arslan v. Yasef nâm Yahûdi meclis-i ma‘kūd-ı mezbûrda mezbûre Hadîce Hatun’un zevci devletlü sa‘âdetlü Beyhan Sultan -dâmet ismetuhâ ve istakarret azametühâ- hazretlerinin kethüdâsı iken bundan akdem vefât eden Abdurrahman Ağa b. Şa‘bân b. Abdullah’ın evlâd-ı sıgārı Ahmed ve Âişe ve Fâtıma’nın tesviye-i emrlerine kıbel-i şer‘den mansûb vasîleri olmağla terekesine vaz‘-ı yed eden Ali Efendi b. Ahmed ile mezbûre Hadîce Hatun’un tarafından vekîl-i müsecceli el-Hâc Hüseyin b. Ebubekir mahzarında üzerine da‘vâ ve takrîr-i kelâm edip müteveffâ-yı mezbûr zimmetinde bin yüz dokuz Şa‘bân-ı şerîfi’nde kendüye bey‘ ve teslîm ol dahi kabz ve tesellüm eylediği mikdârı beynimizde ilm-i şer‘î ile ma‘lûm elvan sandal ve hâre bahâsından iki yüz elli guruş ve fevtinden on beş gün mukaddem kezâlik kendüye bey‘ ve teslîm ol dahi kabz ve tesellüm eylediği ma‘lûmü’l-ecnâs ve’l-evsâf çuka ve makrama ve çekme ve süzme bahâsından yüz altmış altı guruş ve bir zolota ki cem‘an dört yüz on altı guruş ve bir zolota hakkım olup hattâ meblağayn-ı mezkûreyn ciheteyn-i mezkûreteynden zimmetinde bana edâsı lâzım deyni olduğunu hâl-i kemâl-i sıhhatinde huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr merkūm Arslan’dan müdde‘âsına beyyine taleb olundukda udûl-ı Müslimînden müteveffâ-yı mezbûrun kebîr oğlu Mehmed Ağa ve mahrûse-i Galata’ya tâbi‘ kasaba-i Kasımpaşa’da Seferikoz mahallesinde [68b] sâkin müteveffâ-yı mezbûrun etbâ‘ından Salih Efendi b. İbrahim li-ecli’ş-şehâde meclis-i ma‘kūd-ı mezkûrda hâzırân olup istişhâd olundukda fi’l-vâki‘ müteveffâ-yı mezbûr Abdurrahman Ağa b. Şa‘bân b. Abdullah hâl-i sıhhatinde işbu müdde‘î-i merkūm Arslan Yahûdi[ye] ciheteyn-i mezbûreteynden zimmetinde edâsı lâzım dört yüz on altı guruş ile bir zolota deynim vardır deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Çukadâr el-Hâc Süleyman ve Hasan Çelebi ile meclis-i şer‘a gelip alâ-vukū‘ihi inhâ etmeğin mâ-vaka‘a kayd-şüd. Fî 23 min-Safer sene 1110 Şuhûdü’l-hâl: Salih Efendi b. Ahmed, el-Hâc Mehmed b. Ahmed, Ahmed Bey b. Mustafa, el-Hâc Salih b. Ahmed, Abdullah Efendi b. Mahmud.