Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 625 Hüküm no: 777 Orijinal metin no: [139a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âbid Çelebi Mescidi imamlığına Mehmed Efendi’nin tayini Mahmiye-i İstanbul’da vâki‘ merhûm Âbid Çelebi mescid-i şerîfinde vazîfe-i mu‘ayyenesiyle imâm olan Mehmed fevt olup yeri mahlûl olmağın yerine müstahakkından işbu râfi‘-i tevkī‘-i refî‘ü’ş-şân-ı hâkānî ve diğer Mehmed nâm kimesne her vechile mahall ü müstahık olmağın teveccüh olup yedine berât-ı şerîf-i âlîşânım verilmek recâsına ( ) kadısı akzâ kuzâti’l-müslimîn -zîdet fezâilühû- arz etmeğin mezbûra sadaka edip bu berât-ı sa‘âdet-âyât ve meserret-âyâtı verdim ve buyurdum ki ba‘de’l-yevm varıp zikr olunan mescid-i şerîfe mezbûr imâm olup hizmet-i lâzımesin mer‘î ve müeddâ kıldıkdan sonra ta‘yîn olunan vazîfesine mutasarrıf olup vâkıfının rûhu ve benim devâm-ı ömr-i devlet-i efrâz-ı efzûnum -uhrizu efzûnihim- için du‘âya müdâvemet ve iştigāl gösterip ol bâbda hiç âhad mâni‘ olmayıp dahl ü ta‘arruz kılmaya şöyle bileler alâmet-i şerîfime i‘timâd kılalar. Tahrîren fi’l-yevmi’s-sânî ve’l-ışrîn min şehri Şa‘bâni’l-mu‘azzam li sene seb‘a ve tis‘în ve elf. Be makām-ı Kostantıniyye.