Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 373 Hüküm no: 257 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hıristo’nun vefat eden Abdurrahman Ağa’da alacağı olduğunu ispat ettiği Kezâlik akd-i meclis-i şer‘-i şerîf ettikde Sart tâifesinden işbu bâ‘isü’s-sifr Hıristo v. Niko nâm zimmî meclis-i ma‘kūd-ı mezbûrda mezbûre Hadîce Hatun’un zevci devletlü Beyhan Sultan hazretlerinin kethüdâları iken bundan akdem vefât eden Abdurrahman Ağa b. Şa‘bân b. Abdullah’ın evlâd-ı sıgārının tesviye-i emrlerine kıbel-i şer‘den vasiyy-i mansûbları Ali Efendi b. Ahmed ile mezbûre Hadîce Hatun tarafından husûs-ı âti’l-beyânda husûmet ve redd-i cevâba müseccel vekîli el-Hâc Hüseyin b. Ebubekir mahzarlarında üzerlerine da‘vâ ve takrîr-i kelâm edip müteveffâ-yı mezbûr zimmetinde hayyâtlık ücretinden ba‘de küllî hesâb dört bin yetmiş üç sağ akçe hakkım olup hattâ meblağ-ı merkūm cihet-i mezbûreden zimmetinde bana edâsı lâzım deyni olduğunu hâl-i sıhhatinde fevtinden iki ay mukaddem huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı Müslimînden müteveffâ-yı mezbûrun etbâ‘ından kezâlik sâkin Salih Efendi b. İbrahim ve İbrahim Efendi b. İshak li-ecli’ş-şehâde meclis-i ma‘kūd-ı mezbûra hâzırân olup istişhâd olundukda fi’l-hakīka müteveffâ-yı mezbûr hâl-i sıhhatinde fevtinden iki ay mukaddem işbu müdde‘î-i merkūm Hıristo zimmîye cihet-i merkūmeden dört bin yetmiş üç sağ akçe zimmetinde edâsı lâzım deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î vâki‘ hâli kezâlik inhâ etmeğin kayd-şüd. Fî 11 Rebî‘ülevvel sene 1110 Şuhûdü’l-hâl: Eş-şâhidûnü’s-sâbikūn.