Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 374 Hüküm no: 259 Orijinal metin no: [68b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ermeni Mercan Kotoloş’un vefat eden Abdurrahman Ağa’da alacağı olduğunu ispat ettiği Kezâlik akd-i meclis-i şer‘-i şerîf ettikde neccâr tâifesinden işbu bâ‘isü’s-sifr Mercan Kotoloş nâm Ermeni meclis-i ma‘kūd-ı mezbûrda mezbûre Hadîce Hatun’un zevci devletlü Beyhan Sultan hazretlerinin kethüdâları iken bundan akdem fevt olan Abdurrahman Ağa b. Şa‘bân b. Abdullah’ın evlâd-ı sıgārının tesviye-i emrlerine vasiyy-i mansûbu olan Ali Efendi b. Ahmed ile mezbûre Hadîce’nin tarafından müseccel vekîli el-Hâc Hüseyin b. Ebubekir mahzarlarında üzerlerine da‘vâ ve takrîr-i kelâm edip müteveffâ-yı mezbûr zimmetinde emriyle kendüye alıverdiğim mismâr [ve] kereste bahâlarıyla neccârlık ücretimden ba‘de külli’l-hesâb yirmi iki bin dört yüz seksen sağ akçe hakkım olup hattâ meblağ-ı merkūm cihet-i merkūmeden zimmetinde bana edâsı lâzım deyni olduğunu fevtinden yirmi üç gün mukaddem sıhhatde olduğu hâlde huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı Müslimînden Salih Efendi b. İbrahim ve sultan-ı müşârün-ileyhin etbâ‘ından Mehmed Bey b. Hüseyin li-ecli’ş-şehâde meclis-i ma‘kūd-ı mezbûra hâzırân olup istişhâd olundukda fi’l-hakīka müteveffâ-yı mezbûr hâl-i sıhhatinde müdde‘î-i mezbûra cihet-i merkūmeden yirmi iki bin dört yüz seksen sağ akçe lâzımü’l-edâ deynim vardır deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli kezâlik inhâ etmeğin kayd-şüd. Fî 11 Rebî‘ülevvel sene 1110 Şuhûdü’l-hâl: Eş-şâhidûnü’s-sâbikūn.